ZAISA TXINGUDIK ERRUGBIAREN EGUNA OSPATUKO DU BIHAR

Egun guztiko ekitaldiak antolatu ditu klubak, Plaiaundin eta Irungo Kale Nagusian ospatuko direnak

Bi urteren ondoren, bueltan izango da Zaisa Txingudik, Mari, Muri, Ekialde, Imasde, Manolo eta Txingudi Rugby tabernaren laguntzarekin, antolatzen duen Irun Rugby Eguna. Aurten ere, ohi bezala, hainbat jarduera antolatu dituzte egun guztian zehar, eta klubetik jendea animatu nahi izan dute kirol hau ezagutu eta bestaz gozatzeko.

Goizean, Plaiaundin hasiko da Txingudik antolatutako ekitaldia txapelketa batekin. Hain zuzen ere, 10:30ean 14 urtez azpiko taldeak Gipuzkoako mailako txapelketarako balioko duen lehiaketa triangularra jokatuko du. Bertan, Gasteizko Gaztedi B eta Iruñeako La Unica taldeak izango dira Txingudiren aurka aritzen.

Arratsaldean berriz, Irungo Kale Nagusian ospatuko da errugbiaren besta. 17etatik aintzinera, hainbat ekintza egingo dira, hala nola bideoen proiekzioa, eta haurrentzako jolasak, Foru kalean jarriko duten errugbi zelai txiki batean. Gainera, klubaren artikuluak ere erosteko aukera izango dute hurbiltzen diren guztiek, bertan jarriko duten postu batean. 19etan berriz, txaranga bat egongo da inguruko kaleak alaitzen eta egunari amaiera emateko, zozketa batez gain, hirugarren denbora herrikoia ospatuko da gaueko 21etatik aurrera.

Klubetik jendea bertaratzera animatu nahi izan dute, kluba bera eta errugbia ezagutzeko aukera edukitzeko eta giroaz gozatzeko.