Zaisa Txingudik denboraldiko lehen bonus puntua eskuratu zuen etxean

Txingudi Rugby Klubeko senior mailako bi taldeek emaitza aski desberdinak lortu zituzten asteburuan. Alde batetik, Zaisa Txingudik 42-17 irabazi zuen Sortzen C/Beltzak taldearen kontra Plaiaundin, denboraldiko lehen bonus puntua ere lortuz. Bertzalde, Biok Txingudik izugarrizko porrotarekin bukatu zuen asteburuko jardunaldia. 104-10eko markagailuarekin galdu zuen Uni Bilbo taldearen kontra, baina play-offerako sailkapena lortu zuen.

Zaisa Txingudik ez zuen nahi bezala hasi larunbateko partidua Plaiaundin. Lehen puntuak Sortzenek lortu zituen, entsegu baten bidez. Gainera, zelaiaren egoerak ez zion etxekoen jokoari mesederik egin eta melé anitz egin behar izan zituzten aurrelariek baloiak aitzinera egiten baitzuen. Hamalaugarren minutuan ordea, Iñigo Camarero eta Leire Muñozen jokalariek martxa hartu zuten eta touch baten ondotik, Juan Carlos Lorak baloia entsegu-eremuan utzi zuen. “Lutxo” Echevarriak eraldaketa sartu eta 7-5ekoa jarri zuen markagailuan. Lau minutu beranduago, Odin Gutierrezek aurkariaren erasoa moztu eta hagen artean egin zuen entsegua, berriz ere Echevarriak eraldatutakoa (14-5). Bi protagonista hauek gauza bera egin zuten 24. minutuan, bi taldeen arteko hutsunea areagotuz (21-5). 

Bigarren zatian, indarrek behera egin zuten eta defentsan ez ziren hain eraginkor ibili etxekoak. Hala ere, erasoan lan fina eginez, Juan Carlos Lorak pasea egin zion Jenö Kocsiseki eta honek entsegua gauzatu zuen, Echevarriak berriz ere eraldatu zuena (28-5). Bisitariek ez zuten amore eman eta defentsako zuloa aprobetxatuz, bortz puntu gehiago batu zituzten emaitzara. Azken minutuetan, martxa hartu zuen Zaisa Txingudik eta egindako erasoan bonus puntua lortu zuten, denboraldiko lehena. Aurrelariek entseatutako jokaldi batean, Joao Costak bostgarren marka lortu zuen eta Echeverriak eraldatu, 35-10ekoa ezarriz. Sortzenek bertze entsegu batekin erantzun zuen segidan (35-17), baina mugakoek ere gauza bera egin zuten aurkariak galdutako baloi bat hartuz eta Echeverriaren bitartez azken entsegua eta eraldaketa lortuz (42-17).

Garaipen honen ondotik, bortz puntu gehiago batu ditu Zaisa Txingudik sailkapenean, bonus puntua kontuan hartuta. Sailkapeneko azken postua utzi du taldeak honela. Heldu den jardunaldia, apirilean jokatuko du taldeak, berriz ere Plaiaundin, Arratiko Zekorrak taldearen kontra. 

Biok Txingudik play-offerako sailkapena lortu du, porrot egin bazuen ere

Biok Txingudik Uni Bilbo bisitatu zuen asteburuan eta 104-10eko markagailuarekin galdu zuen. Txingudi Rugby Klubeko senior mailako emakumeek bazekiten zaila izanen zela asteburuko jardunaldia eta lehen minututik hori bera erakutsi zuten bilbotarrek. Agintzen hasi ziren lehen minututik eta jipoi ederra jaso zuten mugakoek markagailuan.  

Bilbotarrek eraso bakoitzean lortu zituzten puntuak eta honi aurre egitea zaila izan zen bidasotarrentzat. Bisitarien lehen puntuak 26. minutuan ailegatu ziren, Alba Saizek eskutik. Berrogei metrotik zigor kolpe bat sartu zuen, 40-3koa ezartzeko. Defentsan gogor saiatzen baziren ere, etxekoen jokoaren azkartasunak zuloak aurkitzen zituen eta entseguak lortzen joan ziren. Biok Txingudik ez zuen amore eman eta, bigarren zatian, zigor kolpe bat azkar atera ondoren, Enara Arrutik entsegua lortu zuen, Alba Saizek eraldatu zuena (83-10).

Azken minutuetan, Uni Bilbok bertze hiru entsegu eraldatu egin zituen 104-10ekoa jartzeko markagailuan. Porrot mingarria izan zen mugakoentzat, baina hala ere berri onekin bukatu zuten asteburuko jardunaldia. Izan ere, Neskak Loratzen taldeak porrota egin zuen Gasteizen eta honek, Biok Txingudi txapelketarako play-offera sailkatzea ahalbidetu zuen, lehenengo aldiz taldearen historian. Hurrengo norgehiagoka Plaiaundin jokatuko du taldeak Durangoren kontra martxoaren 29an.

Harrobiko taldeek asteburu gazi-gozoa

Txingudi Rugby Klubeko harrobiko taldeen artean, garaipen bat eta bi porrot izan zen, asteburu gazi-gozoa izatea ekarriz. 18 urtez azpiko taldeak 21-17 irabazi zuen Gernika/Arratiko taldearen kontra. 16 urtez azpikoek berriz, 15-38 galdu zuten talde beraren kontra, eta 14 urtez azpikoek ere 24-15 galdu zuten Hernani/Atletico San Sebastianen kontra.