Zaisa Txingudi Plaiaundin ariko da Rioja taldearen kontra

Txingudi Rugby Klubeko Zaisa Txingudik Plaiaundin jokatuko du asteburuko partidua. Rioja taldea jasoko du bertan, bihar (urtarrilaren 18an) 16:00etan. Aurkari zaila izanen dute mugakoek oraingoan, bere lidergoitza ukaezina bihurtu baita aurtengo denboraldian. Hala ere, etxekoak indarrez zelairatuko dira eta garaipena eskuratzeko gogor borrokatuko dute. 

Biok Txingudik berriz, Gasteizen jokatuko du 2025eko lehen partidua. Gaztediren kontra lehiatuko dira bidasotarrak, igandean (urtarrilaren 19an) 11:45ean. Txapelketa irabazteko hautagaietako bat dira gasteiztarrak eta talde oso sendoa dute. Hala ere, mugakoek euren gaitasun guztiak erakutsiko dituzte zelaian, puntuak poltsikoratzeko asmo garbiarekin. 

Txingudiko harrobiko taldeak Plaiaundin

Txingudi Rugby Klubeko harrobiko taldeak ere etxean ariko dira asteburu honetan. 14 urtez azpiko Txingudi/Baztan/Orereta taldeak bihar, 11:00etan, jasoko du Bultz Bera Bera taldea, Gipuzkoako Ligako lehen faseari bukaera emateko. Etxeko taldea liderra da A multzoak eta postua mantentzeko, garaipena lortu behar du. 

16 urtez azpiko Txingudi/Baztan taldeak hartuko du gazteenen lekukoa. 13:00etan, zelai berean, Hiruherriren kontra jokatuko baitu, Arrasate, Elorrio eta Eibarrek osatutako taldea alegia. Aurreikusi dutenez, lehia gogorra izanen da bi taldeen artekoa, aurkari zuzenak baitira Euskadiko Ligako bigarren faseko B multzoan. 

Larunbateko goizari bukaera emateko, 13:30ean, 18 urtez azpiko Gabiria Txingudi/Bera Bera/Baztan taldeak Hiruherriren kontra jokatuko du baita ere. Hauek etxetik kanpo ariko dira, Donostiako Puio zelaia izanen baitute eszenatoki. Bigarren fasearen hasieran lortutako sentsazio onekin segitu nahi dute mugakoek eta lan txukuna egiteko prest daude. 

Azkenik, igandean, eskolako errugbilarien txanda izanen da. Hauek Atletico San Sebastian taldearen etxean ospatuko den Gipuzkoako topaketean parte hartuko dute, 10:30etik aitzinera.