Urterik onena borobildu dute BATeko emakumeek

Ohorezko Mailan jarraituko du Super Amara BATeko emakumeen talde nagusiak, hirugarren urtez jarraian. Iaz ez bezala, aurten emakumeek ez dute gehiegi sufritu behar izan, mailari eusteko. Laugarren izan dira jaitsiera ekiditeko lehian, larunbatean Valladoliden. Hamabigarren, guztira, estatuko maila gorenean, lau talde atzean utziaz. Historiako sailkapen onena du, hortaz, BATeko emakumeen talde nagusiak.

Gizonezkoen taldeak ere urte ona osatu du, Ohorezko Mailara igotzeko lehian parte hartu baitu, larunbatean Salamancan. Azken uneko lesioek kalte handia eragin diete gizonei, ordea, eta ezin izan dute une erabakigarrian mailarik onena eman. Seigarren izan dira, azkenean, Estatuko Lehen Mailako sailkapen orokorrean.