Urteko lehen neurketa jokatuko du Zaisa Txingudik etxean

Txingudi Rugby Klubeko Zaisa Txingudi taldea martxan izanen da asteburuan, Eguberrietako atsedenaldiaren ondotik. Lehen Itzuliari bukaera emanen dion neurketa jokatuko dute etxean, Plaiaundin, La Unica taldearen kontra. Neurketa larunbatean ospatuko da, urtarrilaren 11n, 16:00etan. 

Abendua garaipen landu batekin bukatu zuten eta lasai joan ziren mugako jokalariak atsedenaldira. Gabonetan merezitako atsedena hartu ondotik, prest dago taldea zelaira bueltatzeko. Lesionaturik zeuden jokalari gehienak bueltan izanen dira jokoan, Iñaki Lantxo eta Keoma Pacheco ezik. 

Aurkaria aldiz, sailkapeneko laugarrne postuan dago kokatuta eta goiko aldean bukatzea dute helburu. Bidasotarrek berriz, azken postuetatik aldentzeko lanean segitzen dute eta hori izanen dute helburu hurrengo jardunaldian ere. 

Emakumeen errugbi sustatzeko jardunaldia Donostian

Txingudi Rugby Klubeko emakumeek aldiz, Donostian izanen dira asteburuan, Aieteko errugbi zelaian ospatuko den emakumeen errugbia sustatzeko martxan jarri duten modalitate berrian parte hartzen. Bost jokalarirekin eta plakajeak mugatuz, Gipuzkoa eta Euskadiko federazioek errugbia ezagutzen ez duten edo kirolarekin lehenengo kontaktuak izan dituzten 12 urtetik gorako neskak egonen dira errugbia probatzen. 

Txingudik, bere aldetik eta helburu berarekin, talde honi espazio propioa eman nahi izan dio eta entrenamendu espezifikoak antolatzen hasi da ortziralero, 17:00etatik aitzinera. Klubetik neska gazte zein heldu guztiak gonbidatu nahi izan dituzte zelaira hurbildu eta errugbia probatzera.