URDANETA ERE GARAITU DU ILCAPO HONDARRIBIAK
Aitor Etxaburuk zuzentzen duen taldeak, bizkaiko lurretan denboraldiko bigarren garaipena erdietsi zuen (30-34) eta sailkapeneko liderra bezala mantentzen da.
Ez-ohiko denboraldia bikain hasi du Ilcapo Hondarribia Eskubaloi taldeak. Muskizen aurka berdindu eta Gure Auzune jipoitu ondoren, larunbatean Urdnetaren aurka denboraldiko bigarren neurketa irabazi zuten (30-34). Sasoian daudenaren seinale, Ilcapo Hondarribia 5 puntu eskuratuta, Euskadiko Senior Ligako liderrak izaten jarraitzen dute.
Urdanetaren aurka jokatzeko, Ilcapo Hondarribiako ohiko jokalariekin batera, Bidasoako lehen taldearekin entrenatu eta jokatzen duten Julen Urruzola eta Eneko Furundarena gazteek jokatu zuten. Gazteak diren arren, maila eta neurri handiko jokalariak dira biak. Hala ere, bi jokalari horien laguntza izan zuten arren, lehedabiziko zatian Ilcapo Hondarribia ez zen oso fin ibili defentsan. Urdanetako piboteak min handia egin zien eta 6 metroetatik gol asko jaso zituzten. Erasoan, aldiz, oso ondo aritu ziren eta atsedenaldira hiru goleko errentarekin iritsi ziren. (14-17). Defentsan zituzten arazoak, erasoko golekin konpondu zituen Aitor Etxabururen taldeak.
Bigarren zatian, Ilcapo Hondarribiaren defentsak jarrera aldatu eta zailtasunetan jarri du Urdanetak pibote lanetan egiten duen jokoa. Erasoko argitasuna mantenduta, markagailuan ihes egiteko kapaza izan zen Ilcapo Hondarribia. Urdanetak amore eman ezean, defentsa aldatu eta zelai osoko banakako defentsara pasa zen. Oso erasokorra den defentsa horretan, talde bizkaitarra lau goletara hurbildu zen, baina Ilcapo Hondarribiak patxadaz jokatzen jakin zuen neurketa moteldu eta jarraian lortutako bigarren garaipena eskuratzeko. Azken emaitza 30-34koa izan zen.
Joseba Zabalaren, Ilcapo Hondarribiaren atezainaren, ustez, “taldeak gauza asko ditu hobetzeko, baina Urdanetaren aurka lortutako bi puntuak oso garrantzitsuak dira kontuan badugu aurreko urtean kiroldegi honetan irabaztea zenbat kosta zitzaigun”.
