Txingudi Rugby Klubeko seniorrek Plaiaunditik kanpo jokatuko dute asteburuko jardunaldia

Txingudi Rugby Klubeko seniorrek etxetik kanpo jokatuko dute asteburuko jardunaldia. Zaisa Txingudi Mungian izanen da bihar, azaroaren 9an, Uribealdearen kontra lehiatzen (14:00). Biok Txingudik berriz, igandean (azaroaren 10ean) jokatuko du asteburuko jardunaldia, Gasteizen, Gaztediren kontra, 12:15ean. 

Zaisa Txingudik Uribealdearen bigarren taldea bisitatuko du Mungian, bihar 14:00etan. Lau jardunaldiren ondotik, bi taldeak sailkapeneko azkeneko bi postuetan daude kokaturik eta beraz, neurketa parekatua aurreikusten da. Iñigo Camareroren mutilek lan ona egin dute azken hiru partiduetan. Gero eta erosoago sentitu dira zelairatu duten jokoarekin eta puntuak poltsikoratzen joan dira. Hala ere, defentsako lana hobetu behar dutela badakite eta hortan aritu dira azken entrenamenduetan, biharko jardunaldian erronka horiei aitzin egiteko. 

Biok Txingudik, bere aldetik, Gasteizera bidaiatu beharko du, bertako Gamarra zelaian Gaztedi taldearen kontra lehiatzeko. Neurketa hau igandean ospatuko da, 12:15ean. Bi taldeak 10 puntu dituzte sailkapenean, beraz, parekatuta daude eta igandeko partidua horrelakoa izatea aurreikusten dute ere. Sentsazio onak ditu mugako taldeak denboraldi hasiera honetan, bi jardunalditan garaipena eskuratuz eta bertze batean guttigatik galduz. Gasteizen puntuak eskuratzea garrantzitsua izanen da bigarren faseari begira, sailkapeneko lehen hiruak izanen baitira Euskadiko Txapelketan arituko direnak. 

Klubeko gazteen hitzorduak

18, 16 eta 14 urtez azpikoek ere hitzorduak izanen dituzte asteburuan. Nagusienak, Gabiria Txingudi/Bera Bera/Baztan taldeak bihar jokatuko du Gernikan, bertako taldearen kontra (12:00). Bi taldeek partidu guztiak galdu dituzte denboraldi hasiera honetan eta puntuak batzeko gogoz aterako dira zelaira. 

16 urtez apziko Txingudi/Baztan taldea berriz, Plaiaundik ariko da, Gaztediren kontra, bihar ere 12:00etan. Lehen bi neurketak irabazi ondotik, sentsazio onak dituzte eta indarrez daude lanean segitzeko asteburuan. 

Klubeko gazteenek, Txingudi/Orereta/Baztan taldeak, Gipuzkoako Liga hasiko du asteburu honetan. Iruñeara bidaiatu beharko dute jokalariek, bertako La Unicaren kontra lehen jardunaldia jokatzeko. Partidua bihar ospatuko da, 10:00etan.