Txingudi Rugby Klubeko seniorrek ezin izan zituzten euren aurkariak garaitu

Zaisa Txingudik Plaiaundin jaso zuen, pasa den larunbatean, Rioja taldea. 3-63ko markagailuarekin, porrota jaso zuen mugako taldeak, nahiz eta bukaera bitarte borrokatzen ibili zen. Baloiaren jabetza errioxarrena izan zen neurketa guztian zehar, baina etxeko jokalariek markagailuan aitzina hartzea lortu zuten lehen minutuetan. Hagetatik hurbil egindako zigor kolpe baten ondorioz, 3-0ekoa ezarri zuten emaitzan. Hortik aitzinera, ordea, Riojak izan zuen nagusitasuna eta puntuak batzen joan zen etengabe. Atsedenaldira bidean, sei entsegu egin zituen aurkariak, horietako bat eraldatuz, eta 3-27koa lortu zuen aldageletara joateko. 

Bigarren zatian, etxekoek hasierako hamabostekoa aldatu zuten, indarberritzeko asmoz eta borrokan aritu ziren azken minutura arte. Hala ere, ez zen nahikoa izan, Riojak erritmoa igo baitzuen eta bertze sei aldiz lortu zuen aurkariaren defentsa zulatzea. Azkeneko jokaldietan, mugakoek entsegua lortzeko puntuan izan ziren, baina azkenik ezin izan zuten lortu eta 3-63koarekin bukatu zen neurketa. 

Txingudikoek atsedenaldia izanen dute orain bi astez eta otsailaren lehen asteburuan jarriko dira berriz ere martxan, Iruñaren kontra izanen duten jardunaldiarekin. 

Biok Txingudik ere porrota jaso zuen Gasteizen

Biok Txingudik ere 49-7ko emaitzarekin galdu zuten Gaztediren kontra asteburuan. Neurketa zaila izan zen eta markagailuak erakusten duena baino berdinduagoa. Hala ere, etxekoek lehen minututik erakutsitako indarrari ezin izan zioten aurre egin eta puntuak Gasteizen utzi zituzten mugakoek. 

Lehen hogei minutuetan, hogeita bi puntuko aldea lortu zuen Gaztedi, 22-0eko emaitza ezarriz. Biok Txingudik aulkia mugitu eta lehia parekatzen joan zen, lehen eraldatutako entsegua lortu arte (22-7). Hala ere, etxekoek neurketari eutsi zioten eta bi taldeen arteko aldea handitzen segitu zuten, bukaerara 49-7ko emaitzarekin ailegatuz. 

Honen ondotik, Biok Txingudi sailkapeneko laugarren postuan kokatzen da bi jardunaldietan partida bat irabazi eta bertze bat galduz. Heldu den larunbatean, Ligako liderra den Uni Bilbo jasoko dute Plaiaundin.

Txingudi Rugby Klubeko gazteak

18 urtez azpiko Gabiria Txingudi/Bera Bera/Baztan taldeak 34-28ko markagailuarekin garaitu zuen Hiruherriren kontra, Donostiako Puio zelaiaren estreinaldian. Bertzalde, 16 urtez azpiko Txingudi/Baztanek aurkari beraren kontra porrota jaso zuten, 15-36ko emaitzarekin. 14 urtez azpiko taldeak ere 5-17 galdu zuen asteburuan Bultz Bera Bera taldearen kontra. Azkenik, Txingudi/Orereta eskolako taldeak ikasitakoa praktikan sartzeko aukera izan zuen atzo Donostian, Hernani, Atletico San Sebastian eta La Unicarekin batera ospatutako topaketan.