Txingudi/Bera Bera/Baztan taldeak eskura eduki zuen garaipena asteburuan

Txingudi Rugby Klubeko 18 urtez azpiko Txingudi/Bera Bera/Baztan taldeak 19nako berdinketa erdietsi zuen, pasa den larunbatean Plaiaundin, Iruñeako La Unica taldearen kontra. Neurketa ezin hobe hasi zuten mugakoek, hirugarren minutuan lehen entsegua lortu baitzuten (5-0). Eguraldiak baldintzatu zuen jokoa, baina etxekoek eutsi egin zioten nagusitasunari. Atsedenaldira bidean, markagailuko errenta oraindik ere zabalagoa izatea lortu zuten, bigarren marka eta eraldaketa eginez (12-0).

Bigarren zatian, La Unica indarrez zelairatu zen eta gipuzkoarrek lehen ordu erdian irekita hutsunea murrizten saiatu ziren, entsegu eraldatu bat eginez eta 12-7koa ezarriz. Partidua parekatu zen momentu horretan, Hodei Aizpuruak, touch-mele baten ondorioz, hirugarren entsegua lortu zuen arte. Eraldaketa ere sartu zuen eta 19-7koa jarri zuen markagailuan. La Unicak amore eman gabe segitu zuen eta bertze bortz puntu batu zituen segidan (19-12). Bukaeran, etxekoek erritmoa jeitsi eta iruindarrek hau aprobetxatu zuten markagailua behin-betiko berdintzeko eta 19nakoarekin bukatzeko partidua. 

Beteranoek bere eguna ospatu zuten Plaiaundin

18 urtez azpiko taldearen partiduaren aitzinetik, Txingudiko beteranoek euren eguna ospatu zuten Plaiaundin jokatu zuten lagunarteko txapelketa batekin. Txingudi, Rioja, Emak Hor eta Bera Berako taldeak izan ziren bertan. Toka modalitatean aritu ziren, hau da, plakajerik gabeko errugbian. Partiduen ondotik, elkarrekin hirugarren denboraz gozatu ahal izan zuten.