Soilik Doneztebek lortu zuen garaipena asteburuan

Baztan-Bidasoaldeko futbol talde nagusien artean, soilik Nafarroako Ligan ari den Preferente mailako Doneztebek lortu zuen garaipena eskuratzea. Huarte Bren kontra jokatu zuten jardunaldia, Iñaki Indart zelaian, eta 3-0eko markagailuarekin puntuak etxean gelditzea lortu zuten. Aimar Jabalerak sartu zituen hiru puntuak eta sailkapeneko lidergotza are gehiago sendotu dute horrela doneztebarrek. 50 puntu batu dituzte sailkapenera, eta 5eko aldea dute orain bigarren sailkatua den Gazte Berriak taldearekin. 

Nafarroako Ligako, Lehen Maila Autonomikoko Baztanek hutsera berdindu zuen etxean ere San Miguelekin. Baja anitzekin ailegatu ziren asteburura baztandarrak, eta ideia garbiekin zelairatu ziren Giltxaurdin. Aukerak sortzeko gai izan ziren, baita baloiaren jabetza edukitzekoa ere, baina ezin izan zituzten hauek goletan gauzatu. Bi taldeak hamar jokalarirekin gelditu ziren bigarren zatian, baina neurketaren norabidea ez zen aldatu eta hutsera berdinduta bukatu zuten, puntuak ere banatuz, Sergio Oskoz prestatzaileak adierazi duen moduan.

Gipuzkoako Ligan, Erregional mailako igoera fasean, Gure Txokoak ere hutsera berdinduta bukatu zuen Matzada, Beasain Brekin. Hauek ere golik sartu gabe bukatu zuten neurketa eta puntuak banatu zituzten aurkariarekin. Sailkapenean ere, berdinduta daude bi taldeak, bortz punturekin, bostgarren eta seigarren postuetan. 

Ohorezko Erregional mailako Beti Gazteko gizonezkoek ere hiruna berdindu zuten Zarautzen kontra, Asti zelaian. Bukaerara arte irabazten ari ziren lesakarrak eta hiru puntuak eurentzat izanen zirela uste zutenean, aurkariak markagailuan berdindu eta puntuak ere banatu behar izan zituzten. Javier Escagües entrenatzaileak penaz bukatu zuen jardunaldia, nahiz eta itxura ona eman eta gogoz begiratu taldearen etorkizunari. Azkenik, maila eta klub bereko emakumeek 5-0 galdu zuten Bergararen kontra asteburuan. Ezin izan zioten talde indartsu bati aitzin egin eta puntuak bertan utzi zituzten. Hala ere, amore eman gabe lanean segituko dute lesakarrek.