SEI DOMINA GIPUZKOAKO TXAPELKETA ABSOLUTUAN

Bidasoa Atletiko Taldeak sei domina eskuratu ditu asteburuan Donostiako Belodroam jokatu zen Gipuzkoako Txapelketa Absolutuan. Pertika jauzian, BAT-eko hiru atletek, urrea, zilarra eta brontzea lortu zuten.

Asteburu honetan, Donostiako Belodromoan Gipuzkoako Pista Estaliko Txapelketa Absolutua jokatu da eta bertan, Bidasoa Atletiko Taldeko hainbat atletek parte hartu dute. Orotara, eskualdeko 51 atletek parte hartu dute Gipuzkoako Txapelketan eta Bidasoa Atletiko Taldea sei dominekin bueltatu zen etxera. Bidasoa Atletiko Taldeko ordezkariek adierazi duten aburuz, “emaitza bikaina da, gure harrobiko atletek egiten ari diren denboraldia benetan oso ona izaten ari da”.

Pertika jauzian Bidasoa Atletiko Taldeko kideak nagusi izan dira. Emakumezkoen lehian, lehen postua, bigarrena eta hirugarrena lortu zuten: Malen Orduñak 3,67 metroko jauzia eginda urrezko domina eskuratu zuen, zilarrezkoa Paula Añorgarentzat izan zen 3,37 metroko jauziarekin eta brontzezkoa Malen De la Fuentek eskuratu zuen 3,22 metroko langa gaindituta.

Bigarren urrezko domina eskuratu zuten ere bai, Irune Muguruzak denboraldi hasierako marka ezin hobea egin zuen 400 metroko proban, 57,69’’ zehazki. Laia Olascoagak 60 metroetan (7,90’’) eta Ane Zabalak 1500 metroetako frogan erdeitsitako hirugarren postuek (4:43:44) osatu zuten Bidasoa Atletiko Taldearen domin kopurua.