Segundo bakarrean egon dira Hondarribia eta Urdaibai, ligaren atarian

Pasai Donibanek hartu zuen, asteburuan, TKE Ligaren atariko azken proba. Hondarribiak lortu zuen garaipena, baina segundo bakarrera gelditu zen Urdaibai, eta hirura Orio. 19:44.92ko denbora egin zuen Ama Guadalupekoak, erlojuaren kontrako lanean.

Larunbatean, uztailaren lehenean hasiko da arraun liga nagusia. Babesle berria du, eta Eusko Label liga izango da orain. Azken urteetan ez bezala, Euskal Herriko uretan hasiko da, Bilboko VIII.Bandera egongo baita jokoan. Igandean, Portugaleten izango da estropada.