San Miguel Ligaren lema hartu du Hondarribiak Malagan

Denboraldiaurrean erakutsitakoa berretsi du Hondarribiak San Miguel Ligako lehen jardunaldian. Txapeldunak joan den urteko mailari eutsi dio Malagan, Mediterraneo itsasoan. Euskadi Basque Country bandera irabazi du, eta lehen hamabi puntuak eskuratu ditu. Horretarako, erlojuaren aurkako lasterketa itzela egin behar izan du Ama Guadalupekoak. Bigarren txandan ez du aurkaririk aurkitu. Hasieratik hartu du estropadaren burua, eta aurreko txandako erreferentziaren aurka aritu da. Azkenean lortu du Urdaibairen marka hobetzea, aldea bost hamarrenekoa izan bada ere.

Azken sailkapenean Orio izan da hirugarren, eta Kaiku laugarren. Dena den, nahiko urrun izan dituzte lehen bi sailkatuak. Momentuz, Hondarribia eta Urdaibai dira talderik indartsuenak. Kantauri itsasotik kanpo jarraituko du San Miguel Ligak hurrengo bi jardunaldietan. Galizian izango dira estropadak datorren asteburuan, Sanxenxon eta Moañan.