Real Unionek Zamoraren kontra galtzen hasi du urtea

Real Unionek 1-2 galdu zuen atzo eguerdian Zamoraren kontra. Denboraldiko lehen itzulia  porrotarekin bukatu dute honela Albert Carbóren mutilek eta sailkapeneko azken postuetan kokatu da, 20 punturekin. Bigarren itzulian, jeitsiera postu horietatik aldentzea ahalbidetuko dien emaitzen bila joan nahi dute. 

Lehen zatiko hogeigarren minutuan hartu zuen aitzina Zamorak. Tresacok Roniri pasea ona egin eta azkeneko honek Wright gainditu zuen, baloia ate barrura sartuz eta 0-1ekoa ezarriz markagailuan. Hala ere, Real Unionek ez zuen amore eman eta hamar minutu beranduago, Quique Riverok penaltia ongi aprobetxatu zuen emaitza berdintzeko. Berriz ere aurrea hartzeko aukera izan zuen talde bisitariak, 34. minutuan penalti bidez, baina talde txuribeltzeko atezainak geldiketa ona egin zuen. Horrela, atsedenaldira, berdinduta ailegatu ziren bi taldeak. Bigarren zatian berriz, 78. minutuan, garaipenaren gola lortu zuen Zamorak, Kike Marquezen eskutik eta behin-betiko, 1-2ko emaitza ezarri zuen bisitariak. 

Porrot honen ondotik, Real Unionek hemezortzigarren postuan bukatu du denboraldiko lehen itzulia, 20 punturekin guztira, azken 27 puntuetatik soilik 4 eskuratuta. Hurrengo neurketa, bigarren itzuliko lehena izanen dena, Sestao Riverren kontrakoa izanen da, ortzirale honetan (urtarrilaren 17an), 20:30ean Las Llanasen.