Real Unionek puntu bat atera zuen Ponferradinaren kontrako partidutik

Real Unionek bina berdindu zuen, pasa den larunbatean etxean, SD Ponferradinaren kontra. Talde bisitariak hartu zuen aitzina markagailuan, lehen gola sartuta, eta talde txuribeltza gai izan zen neurketa berdintzeko. Hala ere, galiziarrek ez zuten amore eman eta bigarren gola ere eskuratu zuten. Azken minutuetan, lan ona egin ondotik, Iker Bilbaok berriz ere emaitza berdintzea lortu zuen, oraingo honetan behin-betiko. 

Partidua hasi eta berehala izan zuen Real Unionek gola sartzeko lehen aukera. Sergio Santosek eskuinetik baloia erdiratu eta Koldo Obietak jaso zuen, bere taldekide batek orraztu ondotik. Hala ere, langaren gainetik joan zen gernikarraren errematea. Hemeretzigarren minutuan aldiz, aurkariaren gola etorri zen. Ponferradinako Alex Costak eskuratu zuen eta euren alde jarri zuen emaitza. 

Bigarren zatian, hau iraultzeko asmotan zelairatu zen Mikel Llorenteren taldea eta sei minutura ailegatu zen etxekoen lehen gola. Vidorretak baloia area barrura sartu eta Sergio Benitori egin zion pasea, azken honek banako berdinketa lortuz. Hurrengo aukera ere txuribeltzena izan zen, Quique Riverok, ezkerretik, urrun zegoen falta batekin saiatu zen baina atezainak kornerrera desbideratu zuen jaurtiketa. Honen ondotik, Ponferradina izan zen berriz ere protagonista, bigarren gola sartuz, Lanchoren burukada baten bitartez. Real Unionek ez zituen besoak jeitsi eta lanean segitu zuen berdinketaren bila. 84. minutuan ailegatu zen hori. Iker Bilbaok Berto Cayargaren kornerra jaso eta erremate bikain batekin, binako berdinketa erdietetsi zuen markagailuan. 

Garaipena ere eskura izan zuen talde txuribeltzak, azken lau minutuetan Joseca Marquezek egindako erremate batekin, bai hau desbideratua joan zen, markagailua bere hortan utziz. Real Unionek puntu bat gehiago eskuratu zuen, sailkapenean hamazazpi batuz guztira, eta Stadium Galen porrotarik jaso gabe oraindik. Heldu den asteburuan, azaroaren 16an, Reala B bisitatu du Mikel Llorenteren taldeak Zubietan (17:30).

Mikel Llorente entrenatzaileak eta Iker Bilbao jokalariak egin dute partiduaren balorazioa.