Real Unionek puntu bat atera zuen Andorraren kontrako partidutik

Real Unionek hutsera berdindu zuen, pasa den ortziralean Stadium Galen, Andorraren kontra jokatutako partiduan. Talde txuribeltzak pare bat aukera izan zuen jardunaldiko hiru puntuak eramateko, baina ez zuenez gola lortu, azkenean puntuak banatu behar izan zituen aurkariarekin. 

Lehen zatian izan zuen Real Unionek gola egiteko aukerarik garbiena. Ander Vidorretak pase sakon bat egin zion Dani Garridori eta azken honek Andorraren atera jaurti zuen baloia. Ratti atezaina prest zegoen baloia gelditzeko eta horrelaxe egin zuen, ezerezean utziz etxekoen saiakera. Talde bisitariak ez zuenez golik sartu, markagailua hutsean zutela joan ziren bi taldeak atsedenaldira. 

Bigarren zatian, bertze aukera bat sortu zuen talde txuribeltzak markagailuan aitzina hartzeko. Sergio Benitok area kanpotik jaurtiketa bat egin zuen eta bide onean zihoala zirudien. Hala ere, eskuineko zutoinetik gertu joan zen eta atea ere ez zuen aurkitu baloi honek. Azken minutuetan bi taldeak zinez saiatu ziren garaipena bereganatzen, baina ez batak ez bertzeak ere ez zuen asmatu eta jardunaldiko puntuak banatu behar izan zituzten azkenik. 

Berdinketa honekin, Real Union hamabostgarren postuan dago kokatuta, 37 punturekin guztira. Heldu den asteburuan, SD Ponferradina bisitatuko du Albert Carbóren taldeak El Toralinen. Partidua igandean ospatuko da, apirilaren 6an, 12:00etan.