Real Unionek porrota jaso zuen Unionistas de Salamancaren kontra

Real Unionek 4-1 galdu zuen atzo eguerdian Unionistas de Salamancaren kontra. Talde txuribeltzak partiduaren bostgarren minutuan sartu zuen gola eta bere alde jarri zuen markagailua. Hala ere, etxekoek emaitza irauli eta hiru golekin, jardunaldiko puntuak poltsikoratzea lortu zuten. 

Dani Garridok ongi aprobetxatu zuen partiduko lehen aukera, gola sartu eta Real Union markagailuan aurreratzeko. Horren ondotik, hainbat aukera gehiago izan zituen talde txuribeltzak, baina ezin izan zituen hauek errematatu. Garrido saiatu zen lehenik, urruneko jaurtiketa batekin, eta Asier Benito ondotik, buruz egindako Finley Munroen jaurtiketa baten errematearekin. Edonola ere, gola sartzen hurrengoa Unionistas izan zen. 36. minutuan Ramiro Mayorrek buruz sartu zuen baloia sarera eta neurketa berdintzea lortu zuen honela. 

Bigarren zatian, markagailua iraultzeko asmotan zelairatu zen etxeko taldea, eta pare bat aukeren ondotik, hori egitea lortu zuen Rabadanen gol bati esker. Real Union berriz ere emaitza berdintzen saiatu zen, baina ezin izan zuen atean asmatu. Partidua erabakita gelditu zen 83. minutuan, Dani Garciak sartuta penaltiaren bidez. Garaipena Salamancan gelditu zela argi zegoenean, etxekoek oraindik ere laugarren eta azken gola sartu zuten luzapenean, berriz ere Dani Garciaren eskutik. 

Porrotaren ondotik, Mikel Llorente entrenatzaileak lehen zati ona egin ondotik, akatsak ere egin zituztela onartu zuen eta horiek konpontzen saiatuko direla hemendik aitzinera.