REAL UNIONEK ILLUECA HARTU ZUEN MENDEAN

Federazio Kopako final-zortzirenak gaindituta, Errege Kopa jokatzeko pausu bakarrera dago talde txuribeltza

Real Unionek Federazio Kopako final-zortzinerak gainditu ditu, Illueca taldea 2-0eko markagailuarekin mendean hartu ondotik. Nuñezek eta Seguinek sartutako golekin, talde txuribeltzari pausu bakar bat falta zaio Errege Kopa jokatzeko txartela irabazteko. Datorren astean saiatuko dira hori lortzen, Stadium Galen Terrassa CFren kontra jokatuko duten final-laurdenetako neurketan.

Neurketa guztian zehar nagusi izan zen etxeko taldea. Lehen zatian, hutsean geratu ziren saiakera batzuen ondotik, 32. minutuan iritsi zen Real Unionen lehen gola. Jardunaldiko hirugarren abagunean, Chema Nuñezek boleaz harrapatu zuen aldaratze bat sarera jaurti zuen eta Illuecako atezainak ezin izan zuen gelditu. Horrela, 1-0ekoa ezarriz, atsedenaldira iritsi zen partidua.

Bigarren zatia bide beretik joan zen talde txuribeltzarentzat. Lehen aukera garbian etxeko taldeak berriz ere asmatu zuen eta 2-0eko markagailua eskuratu zuen. Orduan, Aitor Seguin izan zen protagonista. Area kanpotik jaurtiketa egin eta atezain bisitariak baloia ukitu bazuen ere, ezin izan zuen gelditu eta hau sare barrura sartu zen. Hortik aitzinera, Illueca saiatu zen markagailura hurbiltzen, baina Joel Jimenezek jakin zuen hauek izan zuten aukera bakarra gelditzen.

Honekin guztiarekin, Real Unionek Federazio Kopako final-laurdena jokatuko du datorren asteazkenean, Terrassa CFren kontra, talde honek CD Izarra gainditu baitzuen B Multzoko kanporaketan. Hurrengo neurketa hau gaindituta, talde irundarra finalerdietara pasatuko da eta Errege Kopa jokatzeko txartela irabaziko du gainera.