Real Unionek denboraldiko bigarren itzulia garaipenarekin hasi du

Real Unionek Sestao garaitu zuen pasa den ortziralean, 0-1eko markagailuarekin. Denboraldiko bigarren itzuliko lehen partidua izan zen eta sailkapeneko azken postuetatik ateratzeko lehen pausua eman du honela, talde txuribeltzak. Ander Vidorretak penaltiz sartutako gol batek eman zien garaipena irundarrei eta gogo daude bide honi segida emateko. 

Neurketa hasi eta hamar minutura ailegatu zen gola sartzeko lehen aukera Real Unionentzat. Victor San Bartolomek jokaldi bikaina egin zuen area barrenean eta epaileak penaltia adierazi zuen. Ander Vidorretak hartu zuen jaurtiketa egiteko ardura eta ez zuen hutsik egin. Iago Herrerin gainditu zuen eta markagailua talde txuribeltzaren alde jarri zuen. 

Bigarren zatian, markagailua bere horretan mantentzeko lan egin zuten eta sufritu zuten arren, defentsa lan ona eginda, James Wrighti esker, garaipena eskuratzeko gai izan ziren Albert Carbóren mutilak eta etxera bueltan hiru puntuak ekarri zituzten. 

Garaipen honekin, Real Union sailkapeneko 17. postuan dago kokaturik, 23 punturekin. Behekaldean badago ere, lehen pausua eman du taldeak bigarren itzuli honetan puntuak batzen segitzeko eta jeitsierara daramaten postu horiek ekiditeko. Hurrengo larunbatean izanen dute horretarako aukera berri bat txuribeltzek, Stadium Galen jasoko baitute Gimnastica Segoviana.