Real Unionek azken minutuan galdu zuen puntua O Couton

Real Unionek 1-0 galdu zuen atzo eguerdian Ourenseren kontra. Neurketa guztian zehar golik sartu gabe, baina jaso gabe ere, egon ondotik, hutsera berdinduta ailegatu ziren bi taldeak luzapenera. Orduan sartu zuen Angel Sanchezek etxekoen garaipenaren gola eta jardunaldiko puntuak ere bereganatu zituzten azken minutu horretan. 

Neurketaren 90 minutu ofizialak hutsera berdinduta bukatu zituzten Ourensek eta Real Unionek. Luzapena hasi zen orduan eta baita zorigaiztoko jokaldia ere talde txuribeltzarentzat. Baloia urrundu egin zuten Albert Carbóren mutilek korner baten ondotik, baina aldaratzean etxekoen jokalari batek hartu zuen baloia oinetan eta Angel Sanchezi pasatu zion, area barruan zegoelarik. Honek jaurtiketa gurutzatu bat egin eta gola egitea lortu zuen, partiduko bakarra eta Ourenseri garaipena eman ziona. 

Porrot mingarria izan zen atzokoa Real Unionentzat, baina aste berriarekin hurrengo erronkei begira jarri dira txuribeltzak dagoeneko. Izan ere, heldu den larunbatean Deportiva Leonesa bisitatuko du Albert Carbóren taldeak.