Real Union Rocak bostgarren garaipena segidan lortu du

Tolosa CF: Ander Iriarte; Aitor Aguirre (59, Iker Unzurrunzaga), Jokin Cipitria (81′, Ander Cipitria), Odei Martínez (79′, Xabier Goikoetxea), Iñigo Azurza, Endika Iriarte, Luken Larrañaga, Ander Zubillaga, Yaret Cascante, Aitzol Mendizabal (69′, Xabat Aizpurua), Beñat Rodrigo (66′ Enaitz Tardio).

Real Union Roca: Odei Rodríguez; Ander Fernández, Axel Arrikarte, Unai Arteaga, Aimar Labaka; Mikel Martin (83′, Fermín Corvo), Manu Pinillos, Markel Mancisidor (54′ Eneko Behobide), Peru Martínez Barranco (69′, Asier Unsain); Jon Ortiz, Brice Ghussein (89′, Nicolás Chouza).

Golak: 0-1, Eneko Behobide (89′).

Epailea: Julen Lasarte González. Ez da txartelik egon.

Real Union Rocak 0-1 irabazi zion pasa den astean Tolosa taldeari, bostgarren garaipena segidan lortuz. Azken minutuan Eneko Behobidek sartutako golari esker lortu zuen taldeak irabaztea eta jardunaldiko hiru puntuak poltsikoratzea. 

Lehen zatian, markagailuan aitzina hartzeko aukera izan zuen Jon Ortizek, baina Iriartek geldiketa ona egin zuen. Horrela, hutsera joan ziren bi taldeak atsedenaldira. Bigarren zatian, berriz ere indarrez zelairatu zen Real Union Roca eta hainbat aukera izan zituen gola sartzeko. Arteagak buruz egindako errematea izan zen lehena eta Mikel Martinen jaurtiketa bigarrena. Hala ere, bietako bakar batek ere ez zuen lortu atea barrura sartzea. Amore eman gabe saiatzen segitu zuten eta neurketaren azken minutuan iritsi zen garaipenaren gola. Corvok baloia borrokatu zuen ezker hegaletik area barrura sartzea lortuz. Tolosaren defentsak baloia urrundu zuen, baina aldaratzean, Behobidek jaso zuen eta areaz kanpotik gogor jaurti ondotik, ate barrura sartu zuen baloia. 

Garaipen honekin, Real Union Rocak 23 puntu batu ditu guztira sailkapenean, eta bigarren postuan kokatu da. Heldu den asteburuan, talde txuribeltzak Anaitasuna jasoko du Stadium Galen.  

Axel Arrikarte jokalariak egin du neurketaren balorazioa.