REAL UNION RACING EL FERROLEN AURKA NEURTUKO DA

Irundarrek hamaseigarren jardunaldia jokatuko dute bihar Stadium Galen, arratsaldeko 17etan

Aurreko igandean Tudelanoren aurka garaipena eskuratu eta gero, Real Unionek bihar, larunbata, Racing El Ferrol taldea jasoko du Stadium Galen, arratsaldeko 17etan. Azkeneko jardunaldietan lortutako puntuekin, irundarrak sailkapeneko bostgarren postuan daude kokatuta eta 26 puntu gehitu dituzte osotara.

Sasoi oneko momentu honetan eta beraien maila berreskuratuta, asteburu honetan Real Unionek aurre egingo dio La Coruñako taldeari. Hauek zortzigarren postuan daude eta irundarrek baino lau puntu gutxiago dituzte sailkapenean. Hala ere, Aitor Zulaika entrenatzaileak esaten duen moduan, hori ez da erabakigarria partidua irabazteko. Izan ere, maila honetan neurketa guztiek dute bere zailtasuna.

La Coruñako taldearen inguruan Zulaikak berak aipatu duen moduan, “kasik buruz esango nuke beraien hamaikakoa. Horrekin bakarrik esanda dago zer nolako taldea duten. Jokalari oso kontrastatuak ditu, oso ondo landuak eta ideiak oso argi dituztenak”.

Real Unioneko jokalarien oraingo egoerari buruz, prestatzaileak aurreko asteburuko garaipena ahaztu eta hurrengo jardunaldian kontzentratuta daudela aitortu du: “Aste honetako gure lana Racing El Ferrolen kontrako partidua ondo prestatzea da eta ondoren, zelaian ondo garatzea”. Gainera, onartu du azken aldian “ez da erraza izaten ari partiduen prestakuntza”, eguraldia eta zelaiaren egoera dela eta.

Hala ere, baldintzak hauek guztiak ezin dira aitzakietan bihurtu eta beraien maila onena erakusten jarraitu beharko dute txuribeltzek. Hori egiteko aukera beraz, bihar izango dute, Racing El Ferrolekin duten hitzorduan.