REAL UNION JEITSIERA POSTUETAN

Herrerak sartutako gol batek garaipena eman zion Sabadell taldeari Galen

Real Unionek porrota jaso zuen atzo eguerdian CE Sabadell taldearen aldetik. 0-1eko markagailuarekin galdu zuten txuribeltzek bigarren zatian eta, hiru puntuak galduta, sailkapeneko jeitsiera postuetan sartu dira berriro.

Lehen zatia hasi eta berehala eduki zuen Real Unionek markagailuan aurreratzeko aukera. Oiartzunen falta zuzen baten bidez, 1-0ekoa ezartzeko puntuan egon zen taldea, baina Ortola atezainak geldiketa ona egin zuen. Sabadell-ek jokaldi honi erantzun eman zion hurrengo minutuetan Keitaren bidez. Hala ere, bertze behin jokalari onena izan zen Irazustak gola ekidin zuen. 17. minutuan berriz, Montoro saiatu zen gola sartzen, 20 metrotik, baina ez zuen atean asmatu. Real Unionen aukerarik garbiena, atsedenaldira ailegatzeko hamabost minutu falta zirenean izan zen. Bravok jaurtiketa ona egin zuen ezker hankarekin, baina Ortolak berriz ere baloia gelditu zuen. Aldaratzean berriz, Sanchezek izan zuen errematatzeko aukera, baina ezin izan zuen asmatu.

Hutsean hasi zuten bi taldeek partiduaren azken zatia. Lehen aukera, bertze behin, etxekoena izan zen, baina Ortolak bere maisutasuna erakutsi zuen laugarrenez. 68. minutuan berriz, partidua aldatuko zuen gola iritsi zen. Sabadell taldeko Gualdak jokaldia egin eta Herrerari pasatu zion baloia. Honek, aukera aprobetxatu, eta 0-1ekoa ezarri zuen markagailuan. Real Unionek honi erantzun nahi izan zion azken minutuetan, eta Azkuek izan zuen horretarako aukera. Buruz egindako erremate batekin berdinketa eskuratu nahi izan zuen, baina ezin izan zuen atean asmatu.

Jardunaldiko hiru puntuak galduta, Real Union sailkapeneko jeitsiera postuetan sartu da berriz ere. Egoera larrian dago taldea eta garaipenaren beharretan. Horrela, porrot hau ahantzita, gaurtik aitzinera datorren asteburuko partiduan jarriko dute begirada, Osasuna Promesas taldearen kontra jokatuko duten neurketan hain zuzen ere.

(Argazkia: Aimar Lasa)