Peña II-Albisu bikotea Etxeberria-Martijaren kontra ariko da Bixintxo Pro jaialdian
2025ko urtarrilaren 24an, Hendiako Bixintxo besten barrenean, Bixintxo Pro pilota jaialdia ospatuko da bertze urte batez, Endaiarrak Pilota Taldeak antolatuta. Goi mailako pilotariak izanen dira Daniel Ugarte frontoian, 20:45etik aitzinera. Lehen partidan, B serie Ligakoan, Salaberria eta Gaskue ariko dira Senar eta Eskirozen kontra. Partida nagusian berriz, Lehen mailakoan, Peña II-Albisu bikotea P.Etxeberria-Martijaren kontra lehiatuko da.
Mikel Larralde Endaiarrak Pilota Taldeko ordezkariak aipatu duenez, pozik dago 2025eko kartelarekin ere, nahiz eta "Jokin Altuna frontoitik pasatzea falta den". Urtez urte Altuna txapeldun handia Hendaiara ekartzeagatik borrokan dago taldea, baina ez dute lortzen. "Historian txapeldun handiak pasatu dira Hendaiatik eta Jokin Altuna falta zaigu", gaineratu du. Hala ere, urtarrileko kartela ona dela ere azpimarratu du, azken aldian zer errana ematen ari diren pilotariak ere etorriko baitira Daniel Ugartera: Peña II, Albisu, Martija edota binakako azken txapela jantzi zuen Peio Etxeberria, bi aldiz segidan Lau t´erdiko finalista izateaz gain.
Sarrerak dagoeneko salgai daude, 20 euroen truke. 18 urtez azpikoek berriz, doainik sartu ahal izanen dira frontoira, klubetik gaztetxoen pilotarekiko afizioa sustatu nahi baitute eta hauek euren erreferenteak bertatik bertara ikusteko aukera luzatu ere. Sarrerak eskuratzeko beraz, (00 33) 687 53 73 13 telefonora deitu beharko da, edota endaiarrak.euskalpilota@orange.fr helbide elektronikora mezu bat igorri.
