NUTRIZIO HITZALDIAK REAL UNIONGO HARROBIKO FAMILIENTZAT

Real Unionek eta FYLABek nutrizio hitzaldiak antolatu dituzte aste honetan harrobiko jokalarien gurasoentzat

Real Union Klubak eta FYLAB enpresak hitzaldiak antolatu dituzte aste honetan zehar harrobiko jokalarien gurasoentzat. “Nutrizioa, osasuna eta errendimendua kirolari gaztearengan” izenburupean, asteazken eta ortzegunean eskainiko dituzte mintzaldiak Ander Buenetxearen eskutik. Jokalariengan ohitura osasungarriak eta kirola sustatzeko asmoz, elikadurari buruz arituko da Buenetxea.

Asteazken eta ortzegunean, hilaren 8an eta 9an, ospatuko dira hitzaldiak harrobiaren bilera-aretoan. Lehenengo egunekoa klubeko Ohorezko Infantil mailako eta Infantil Txikiko taldeetako gurasoei zuzenduta egonen da. Ortzegunekoa berriz, Ohorezko Kadete mailako eta Gorengo Kadete mailako gurasoei. Bi egunetan 18:30ean izanen dute hitzordua Ander Buenetxea nutrizionistarekin.

“Nutrizioa, osasuna eta errendimendua kirolari gaztearengan” izenburupean, elikaduraz, kirolaz eta, orohar, ohitura osasuntzuez arituko da Buenetxea. FYLABeko dietista-nutrizionista, nutrizio klinikoan eta kirol-nutrizioan aditua da batez ere. Egiten duen lanean, bere helburua, elikaduraren bidez, errendimendua eta errekuperazioa optimizatzea izaten da, kirolarien gorputz-osaera kontuan hartuta. Denboraldi honetan, Real Union eta Bidasoako lehen taldeekin lanean ari da Buenetxea, nutrizio-plan indibidualizatuak prestatzen.