MIKEL ZABALA 2023ra ARTE LOTU DU BIDASOAK

Bidasoak eta Mikel Zabalak 2023ko ekainaren 30era arte luzatu dute elkarri lotzen dien akordioa.

Bidasoak ezker hegalekoa 2018ko udan fitxatu zuen Somos Eibar Eskubaloitik. Gazte mailaten Espainiako selekzioaren ibilitakoa, fitxatu zutenetik, 2018/2019 denboraldiko 45 neurketatan eta 2019/2020 denboraldiko lehen itzulian 86 gol sartu ditu. Horietaz gain, Errege Kopako sei partidetan 15 gol erdietsi ditu , Asobal Kopako lau neurketetan 7 gol eta Velux EHF Champions Leagueko hamar partidu jokatu ditu 22 gol erdietsiz.

Eibartarrak aitortu du, "oso pozik" dagoela Irunen jarraitu ahal izateagatik. “Gipuzkoako jokalari ororentzat ametsa da Bidasoan jokatzea eta jarraitzeak ilusio handia egiten dit ", gaineratu du.

Aurtengoa Zabalaren bigarren urtea izan da Irunen eta ondorengo balorazioa egin du: "Bi urte hauetan ikasteko gogo handia izan dut. Kirolean gauzak oso ondo joan zaizkigu, eta talde handiei irabaztea lortzen ari gara, une garrantzitsuetan. Bi urte hauek pertsona eta jokalari gisa hazteko balio izan didate, eta datozen hiru urteak berdinak izatea espero dut ".