Mariñok ezin izan dio lehen garaipenari segida eman

ATHLETIC B: Amaia Peña, Irati (Maitane 64'), Sierra (Naroa 76'), Sara (Jone Rodríguez 68'), Bea, Jone Ibañez, Damaris, Oihane, Eider (June 71'), Leyre, Leia.

MARIñO: Laura, Carla (Ey 46'), Udane, Lide, Erkuden (Maialen 58'), Nekane, Sara, Maddi, Marina (Itzel 68'), Gorbea, Uxue.

GOLAK: 1-0: Leia(18'). 2-0: Leia (21'). 3-0: Leia(63'): 3-1: Sara (75').

Bost partida jarraian berdindu ondoren, lehen garaipena lortu zuen Mariñok joan den jardunaldian. Baina oraingoan amore eman behar izan du Lezaman, Athletic B filial indartsuaren aurrean. Itxura ona eman zuten urdinek neurketaren hasieran. Baina hiru minutuko tartean, ihes egin zien neurketak. Bi gol sartu zituen Leiak, 18.ean eta 21.ean. Kolpe latza izan zen irundarrentzat.

Bigarren zatian arriskatu behar izan zuen Mariñok, eta hutsune gehiago utzi zizkion etxeko taldeari. Zuri-gorriek ez zuten aukera alferrik galdu, eta hirugarren golarekin norgehiagoka erabaki zuten, 63.minutuan. Leiak hat trick-a borobildu zuen. Sara Olaizolak aldea murriztu zuen hamabi minutu beranduago, baina berandu zen Mariñorentzat. Emakumeen Bigarren Mailako sailkapenean, zortzigarren postuan daude orain urdinak, eta Peñas Oscense azken sailkatua hartuko dute igandean Landetxan (12:00).