Mariño Real Unionek ezin izan zuen punturik batu asteburuan

Mariño Real Unionek porrota jaso zuen pasa den asteburuan Stadium Galen, Eibar Cren kontra 0-1 galdu ondotik. Denboraldi honetan talde irundarrak galtzen duen bigarren partidua da soilik, eta biak ere aurkari gogor batzuen kontra izan dira, Reala eta Eibar. Horrez gain, Imanol Gomezen jokalariek maila eman zuten, neurketa intentsoa jokatu zuten eta beraz, balorazio positiboa egin du honen inguruan Mireia Zumeta jokalari eta kapitainak. 

Eibar Ck gola sartzeko “aukera garbirik ez” zuela eduki onartu du Zumetak eta lortu zuten bakarra, Mariño Real Unionen akats baten ondorioa izan zela. Orokorrean, zaleek “partidu intentsoa eta interesgarria” bizitu ahal izan zutela adierazi du jokalari irundarrak. Gaineratu duenez, “batzuetan beldurra sentitzen ahal duzu aurkari batzuen kontra aritzerakoan, baloiak gora botatzeko arriskua izaten da. Hala ere, gu ongi aritu gara, jokatu dugu, futbola ikusi da, baita talde lana ere”. Alde horretatik beraz, pozik gelditu ziren jokalariak, nahiz eta neurketa bukaeran “amorrua” sentitu ez irabazteagatik, hotzean pentsatuta balorazio positiboa egin zuten jardunaldian. 

Mireia Zumeta jokalari eta kapitaina.