Mariño Real Unionek bere aurkari zuzenari irabaztea lortu zuen

Mariño Real Unionek 0-1 irabazi zuen asteburuan Eibarren kontra. Unbe zelaian jokatu zen aurkari zuzenak ziren bi taldeen arteko lehia eta irundarren alde erori zen balantza. Bigarren zatian lortutako golari esker, Imanol Gomezen taldeak poltsikoratu zituen jardunaldiko hiru puntuak eta horrela, sailkapeneko laugarren postua eskuratu zuen, Eibarrekin aldea handituz. 

Ane Lopetegui jokalariak neurketa hunkigarria izan zela aipatu du. Lehen zatian, sailkapenak erakusten zuen bezala, “maila beretsuan” aritu ziren bi taldeak eta hori ere markagailuan islatu zen, hutsera berdinduta ailegatu zirelako atsedenaldira. Bigarren zatian berriz, indartsu zelairatu ziren irundarrak eta lehen gola sartu zuten, nahiz eta baliogabetua izan, epaileak jokoz kanpo zegoelako adierazi zuelako. Horren ondotik ordea, 20. minutuan, garaipenaren jaurtiketa ailegatu zen. Lopeteguik erran duenez, “gure erdilari batek hegaleko jokalariari egin zion pasea eta hau ateraino igo zen bakarrik. Baloia erdiratu zuen eta aurrelariari eman zion, azken honek jaurti eta gola sartzeko”. 

Garaipena “izugarria” izan zela onartu du Ane Lopeteguik. “Bi taldeak oso ondo jokatu” zutela iritzi dio, baina irundarrek grina nabaritu zela eta irabazteko gai izan zirela azkenean. Hiru puntu gehiagorekin, Mariño Real Unionek laugarren da sailkapenean, 58 punturekin guztira. Aitzinetik, Elorrio dago, 60 punturekin, eta gibeletik, Eibar 56 punturekin. Heldu den asteburuan, hain zuzen ere, hirugarren postuan dagoen Elorrio jasoko du talde irundarrak Ugalde Ventas zelaian eta irabaziz gero, aitzina hartuko lioke aurkariari.