Mariño Real Unionek berdinketa batekin bukatu du denboraldiko lehen itzulia

Mariño Real Unionek 2-2ko berdinketa lortu zuen, pasa den igandean, Bizkerre taldearen kontra. Denboraldiko lehen zatia bukatu du talde irundarrak honela, 34 punturekin guztira eta sailkapeneko laugarren postuan, hain zuzen ere Bizkerre taldearen gibeletik. Euskal Ligan jokatzen duen lehen urtean, denboraldi hasiera borobila egin du talde irundarrak. 

Bizkerreren kontrako neurketa ez zen ongi hasi Mariño Real Unionentzat. Etxekoek bi gol sartuta eta bisitariek bakarra, 2-1eko markagailuarekin joan ziren atsedenaldira. Mireia Zumeta jokalari eta kapitainak aipatu zuenez, “hasieran nahiko partidu txarra egin dugu, intentsitateari dagokionez”. Kontuan hartu beharra dago, Bizkerre Hirugarren mailatik jeitsi berria den taldea dela eta Zumetak onartu duenez, “kalitatezko taldea” dela. Horrez gain, irundarrek ez ziren ongi kokatu zelaian. 

Aldageletan hitz egin ondotik, Imanol Gomezen taldea desberdin kokatu zen zelaian: “Jarrera aldatu genuen eta intentsitate gehiago sartu genion jokoari. Horrez gain, apustu egin genuen eta jende gehiago jarri genuen aurrea, defentsan soilik hiru utziz”. Horrela, “askoz hobeto” aritu zirela azpimarratu du kapitainak eta markagailuan ere hori bera islatu zen. Bigarren gola sartzeko gai izan ziren eta berdinketa eskuratzeko. 

2-2koarekin pozik joan ziren etxera Mariño Real Uniongo jokalariak eta lehen itzuliari ere bukaera ezin hobea eman diote. Izan ere, Euskal Ligan jokatzen duten estreinako denboraldian, 34 puntu batu dituzte dagoeneko sailkapenean eta laugarren postuan kokatu dira. Orain arte, guztira, hamar garaipen, lau berdinketa eta hiru porrot jaso dituzte. Euren aitzinetik, hiru puntura, Bizkerre taldea dago hirugarren postuan eta bostgarrenean, puntu bakarrera, Eibar dute. Lehen eta bigarren postuan pixka bat urrunago dituzte, baina ez gehiegi: bigarren postuan Elorrio dago kokaturik, 40 punturekin, eta lehen postuan Real C, 46 punturekin.