Mariño Real Unionek azken asteetako bolada txarrari buelta eman dio

Mariño Real Unionek 1-5ko markagailuarekin garaitu zuen asteburuan Bizkeneskak. Azken bi asteburuetan porrot egin ondotik, berriz ere garaipenaren bidean sartu dira irundarrak. Nahiz eta ez zuten denboraldiko partidurik hoberena jokatu, golak sartu ahal izan zituzten eta nagusi izan ziren alde horretatik, jardunaldiko hiru puntuak bereganatzeko adina. 

Lehen zatian hiru gol sartu zituen Mariño Real Unionek eta 1-3ko emaitzarekin joan ziren bi taldeak atsedenaldira. Mireia Zumeta jokalari eta kapitainak onartu duenez, “ez zen partidurik hoberena izan, ezta hoberenetarikoa ere, baina neurketa ona izan zen”. Izan zituzten lauzpabost aukeretatik hiru sartu ziren barrura eta markagailua euren alde jartzeko gai izan ziren.

Bigarren zatian, gainera, intentsitatez zelairatu ziren irundarrak eta garaipena erabakita utzi zuten bertze bi gol sartuta. “Jarrera aldatu genuen eta gure artean egindako aldaketek ere ongi egin ziguten”, adierazi du Zumetak. Horrela, jokoari buelta emanda, “sentsazio onekin” bukatu zutela ere azpimarratu du, batez ere azken asteetako “bolada txarrari buelta eman” diotela sinetsita direlako.