Lehen zatian besterik ez dio eutsi Hondarribiak Tolosari

Hondarribiaren eta Tolosaren arteko aldea agerian gelditu zen igande eguerdian Hondartza kiroldegian. Lehen zatian, kanpokoen erritmoari eustea lortu zuten etxekoek. 10-13ko markagailu duinarekin iritsi zen atsedenaldia. Baina bigarren zatian, min hartuta dauden jokalarien falta nabaritu zuen Hondarribiak.

Azken ahalegin batean, 16-17ra hurbildu ziren berdeak Andoni Venturaren golarekin. Hortik aurrera, tolosarrak izan ziren nagusi. Aldea handituz joan ziren, amaierako bederatzi goleko abantaila lortu arte. Egutegiko tarte zailenari amaiera emango dio Javier de la Hazaren taldeak larunbatean. Santoñan ariko da (18:30). Estatuko Lehen Mailako sailkapenean, hirugarren tokian dago talde kantabriarra.

Beste partida bat berdindu du Bidasoa Bk

Urdulizen berdindu zuen larunbatean HTG Express Bidasoak (25-25). Etxetik kanpo jokatu dituen azken hiru partidetan, bi puntu besterik ez ditu eskuratu. Sailkapeneko lidertzan dago filiala, baina azken hilabeteko irregulartasuna dela eta, hiru puntura hurbildu zaio Gure Auzune taldea. Hurrengo jardunaldian, Escolapios hartuko du Pedro Salcedoren taldeak, Artaleku Kiroldegian.