JOSE MANUEL SIERRAK AGUR ESANGO DIO ESKUBALOIARI

Gaur goizean Gurutz Aginagalderekin batera eman duen prentsaurrekoan erretiroa hartuko duela jakinarazi du

Jose Manuel Sierrak, Bidasoako atezainak, denboraldi honen amaieran erretiroa hartuko duela jakitera eman du gaur goizean taldeak eman duen prentsaurrekoan. Nahiz eta aspaldi buruan zuen ideia izan, pausua emateko momentua ailegatu zaiola aipatu du: “Oraindik ez naiz jabetzen ez naizela gehiago arituko zortzi urte nuenetik egin dudan hortan. Oso erabaki zaila da, baina denak du hasiera eta amaiera”.

Jarraian, bere ibilbidearen errepasoa egin du, Bartzelonako taldearen deia jaso zuenetik: “18 urterekin atera nintzen etxetik gustuko nuena egitera”. Lau urte han eman eta gero, Valladoliderako bidea hartu zuen eta bertan, “jokalari moduan nire etapa onena bizi izan nuen”, onartu du Sierrak. Hurrengo urteetan, beste bost hiritan jokatzeko aukera izan zuen, Ciudad Realetik hasi eta Irunera ailegatu arte, tartean Europako beste hiru hiritik pasatuta: Paris, Szeged eta Saran. Gainbegirada honekin amaitzeko, urte hauten guztietan izan dituen “taldekide, entrenatzaile, zuzendari eta afizioari” eskerrak eman nahi izan dizkie “beregan konfidantza edukitzeagatik eta oso maitatua” sentitu delako beti.

Bidasoa taldea izan da bere karrerako azken geldialdia eta oso pozik dagoela hartu zuen erabakiarekin esan du Sierrak: “Bete-betean asmatu dut hona etortzen”. Gainera, berarentzat oso berezia izango da Irunen erretiroa hartzea, izan ere aipatu duen moduan, “hasi nintzen klubaren koloreak, Pedro Alonso Niñoren kolore hori eta urdinak, erretiratuko naizen klubaren berdinak dira”. Bukatzeko, Gurutzi eskerrak eman nahi izan dizkio “agurran gidatzeagatik, niretzat zerbait berria delako”.

Prentsaurrekoari amaiera emateko, hunkituta hitz egin du Gurutz Aginagaldek. Honek, Sierraren “konstantzia eta gainditzeko indarra” goraipatu nahi izan ditu, atezaina “klubak nahi zuen eredua” izan dela azpimarratuz, batez ere Bidasoako parte diren gazteentzat. Azkenik, Aginagaldek eskerrak eman dizkio urte hauetan Bidasoaren atal bilakatzeagatik: “Plazer bat izan da, betirako eskertuak egongo gara talde honen parte izatea erabaki zenuelako eta zorterik onena opa dizut”.