Jardunaldi bikaina izan dute Ohorezko Erregionaleko talde bidasoarrek

Ohorezko Maila Erregionaleko bi ordezkari bidasoarrek irabazi dute hogeita bigarren jardunaldian. Hondarribia Futbol Elkarteak bolada txarra hautsi du, Orioko Mendibeltzen Getariako Keta mendean hartuta (0-3). 2016ko aurreko sei jardunaldietan, berdeek ez dute garaipen bakarra ere lortu. Beraz, konfiantza berreskuratzeko eta indarberritzeko balio izan die Orion irabazteak. Sailkapeneko hamargarren postua daude orain, baina puntu bakar bat gehiago du zazpigarrenak. Asteburuan Tolosa liderra hartuko du Hondarribiak.

Real Union Bk Oñatiko Aloña Mendi gainditu zuen igandean Stadium Galen (2-0). Bi garaipen daramatza segidan filialak, eta ondorioz, gora egin du Ohorezko Erregionaleko sailkapen nagusian. Laugarren postuan dago orain. Bi puntu gehiago ditu Mutriku hirugarren sailkatuak. Asteburuan Elgoibarren ariko dira txuribeltzak.