Hamabost gol besterik ez ditu jaso Bidasoak

ACADEMIA OCTAVIO: García, Batán (1), Bernárdez (2), Conde, Fernández (1), Figueirido (1), Gayoso (2), Hermida (3), Iglesias (2), León, Méndez (1), Piñeiro (1), Quintas (1), Veiga.

BIDASOA: Zubiria, Azkue (5), Beltza, Bezbradica, Cavero (4), Crowley (2), Davidovic, Dejanovic, Martínez (5), Mouriño (1), Muiña (4), Kauldi (4), Portero, Vázquez (3), Villar (1).

MARKAGAILUA: 0-3, 0-6, 2-9, 4-11, 6-12, 9-13 (atsedenaldia); 10-17, 12-19, 12-23, 12-26, 13-29, 15-31.

Bidasoa-Irunek ez du alferrik bidaiatu. Lan txukuna egin du Vigoko As Travesas kiroldegian, eta beste bi puntu ekarri ditu bueltan. Helburua argi zutela, kontzentratuta irten dira irundarrak kantxara. Defentsako lana izan da garaipenaren oinarri. Hamaikagarren minutuan sartu du Octaviok lehen gola (1-6). Lehen ordu laurdenean, irundarren nagusitasuna erabatekoa izan da. Azken txanpan, aldiz, erritmoa lasaitu dute, eta Octaviok markagailuan hurbiltzeko baliatu du aukera (9-13). Itxaropena berreskuratuta joan dira etxekoak aldagelara. Baina laster konturatu dira ameskeria zela garaipenean pentsatzea.

Bigarren zatian defentsa estutu du berriro Bidasoak, eta etengabe handitu du abantaila. Hogeita bi minututan, hiru gol besterik ez ditu sartu Academia Octaviok (12-27). Fernando Boleak jokalariak aldatzeko eta esfortzua neurtzeko baliatu du bigarren zatian. Hala ere, aurkaria txikitu du Bidasoak. Agerian gelditu da taldeen arteko desoreka. Irundarra talde indartsua da, eta estutzen duenean, mailako edozein talde jipotzeko gai da. Dena den, sailkapenaren buruko arerioek ere ez dute hutsik egiten. Beraz, Bidasoak ezin du lasaikeriarik onartu.