Gure Txokoak nagusitasunez irabazi zuen etxean Allerru Bren kontra

Emakumeen Ohorezko Erregional mailan, Beti Gaztek 4-2 galdu zuen pasa den larunbatean Goierri Gorri taldearen kontra. Saikapeneko bigarren postuan kokatua dagoen taldea bisitatu zuten lesakarrek eta, aldez aitzinetik, garaipena eskuratzea zaila izanen zela bazekiten. Lehen hamar minutuetan bi gol sartu zituzten etxekoek eta horrek min egin zion Beti Gazteri. Hala ere, markagailua berdintzeko gai izan ziren bisitariak eta bigarren zatian, hori iraultzeko intentzioarekin zelairatu ziren. Lanean ibili ziren hori lortzeko, baina ez zen posible izan. Euren akats batzuen ondotik, Goierri Gorrik bertze bi gol sartu zituen eta puntuak poltsikoratu zituzten. Emaitza ona izan ez bazen ere, lesakarrak pozik gelditu ziren erakutsitako indarrarekin eta horrela segitzeko intentzio garbia dute, Ainara Otxoteko bigarren entrenatzaileak aipatu bezala. 

Gizonezkoen Ohorezko Erregional mailako Beti Gaztek ere, 2-0eko markagailuarekin galdu zuen azaroaren lehenean Anaitasunaren kontra jokatutako partiduan. Hirugarren mailatik jeitsi berria den taldea da Azkoitikoa eta hori jokalarien indarrean nabaritu zen. Lehen zatian ez zuten aukera garbirik eduki, ez talde batek ez bertzeak ere, baina etxekoek atsedenaldira 1-0eko markagailuarekin ailegatzea lortu zuten. Bigarren zatian bigarrena ere eskuratu zuten eta honek min egin zion Beti Gazteri. Hala ere, bigarren gol horrek erreakzioa suposatu zuen lesakarren taldean eta euren bertsiorik onena zelairatu zuten hortik aitzinera, nahiz eta ezin izan zuten golik lortu. Emaitza ez bazen euren alde jarri ere, Javier Escagües entrenatzaileak aipatu du azken minutuetan erakutsitako mailarekin geldituko direla, hurrengo jardunaldietan garaipenak eskuratzen saiatzeko. 

Erregional mailan azkenik, Gure Txokoak garaipena eskuratu zuten asteburuan, Allerru Bri 4-0eko emaitzarekin irabazita. Sekulako maila eman zuten beratarrek eta euren bertsiorik onena zelairatu zuten Matzadan. Horrek hiru puntuak eskuratzea ekarri zuen, baita sailkapeneko bigarren postuan kokatzea ere, liderretik puntu bakarrera. Ganix Zubieta entrenatzaileak aipatu du joko berarekin segitu nahi dutela heldu den asteburuan ere, Landetxaren kontra. Aurkaria sailkapeneko hirugarren postuan baitago, beratarretik bi puntu bakarrera.