Gola falta izan zaio Real Unioni

REAL UNION: Txusta, Azkoiti, Aimar, Esnaola, Urkizu, Rodellar, Martins (Iriondo, 89'), Ozkoidi (Urbieta, 85'), Mikel Alonso, Eizmendi, Mujika (Barrón, 74').

SOCUéLLAMOS: Facundo, Pérez, Zurdo, Trillo, Rodriguez, Rivas, Pituli (Pablo, 62'), Chato, Javi Gómez, Ocaña (Calle, 72'), Domínguez (Garrido, 83').

EPAILEA: Pardeiro Puente. Txartel horiak: Azkoiti, Rodellar, Mujika (Real Union); Ocaña, Domínguez (Socuéllamos).

Sufritutako puntua lortu du Socuellamosek Stadium Galen. Ontzat eman du berdinketa Gaztela-Mantxako taldeak, gehiago izan baita Real Union bigarren zatian. Lehenengoa parekatuagoa izan da. Etxekoek izan dute baloiaren jabetza, baina nekez lortu dute aurkariaren defentsan hutsuneak topatzea. Socuellamosek, berriz, bi gol aukera argi izan ditu. Ahalegin fisiko handia egin behar izan dute kanpokoek, eta bigarren zatian ordaindu dute.

Atsedenalditik aurrera nagusi izan dira txuribeltzak. Socuellamosek behera egin du, eta bere zelaian sartu du Real Unionek. Erasoko baliabide sorta erakutsi du Aitor Zulaikaren taldeak. Hegaletatik sartu dira irundarrak, erdiratzeak egin dituzte, eta kanpoko jaurtiketak ere bai. Ozkoidik, Barronek eta Alonsok izan dituzte abagunerik onenak, baina ez dute asmatu. Real Union ez da eraginkorra izan Facundoren atearen aurrean. Ondorioz, puntu bakar bat eskuratu du. Stadium Galen galdu gabe jarraitzen badu ere, sailkapeneko lehenak urruntzen ari zaizkio Unioni. Arrazoia, etxetik kanpoko emaitza kaskarrak.