FÜCHSE BERLINEK BERE NAGUSITASUNA ERAKUTSI ZUEN ARTALEKUN

Bidasoak ezin izan zuen ezer egin munduko talde onenetako baten kontra

Bidasoak Füchse Berlin, EHF European Leagueko D multzoko liderra, jaso zuen atzo gauean Artalekun. Sailkapeneko liderra ez ezik, munduko talde onenetarikoa da alemaniarra eta hori bera azaleratu zen atzoko neurketan. Talde irundarrak ahaleginak egin zituen errenta ahalik eta txikiena izateko, baina azkenean zortzi golengatik irabazi zuen aurkariak, 32-40ko markagailuarekin.

Partiduaren lehen gola Pedro Pachecok sartu zuen, baina Bidasoak ezin izan zuen denbora aunitzez buruzagitza mantendu. Füchse golak sartzen hasi zen (3-7) eta, zazpigarren minutuan, Jacobo Cuetarak lehen hutsartea eskatu zuen. Etxeko taldea errenta txikitzen saiatu bazen ere, alemaniarrek euren indarra inposatu zuten kantxan eta atsedenaldira 17-23koarekin iritsi zen neurketa.

Bigarren zatia bide beretsutik joan zen. Lehen minutuetan Bundesligako liderrak hamar goleko aldea erdietsi zuen markagailuan (19-29) eta horretan jarraitu zuen denbora pasatu ahala. Errenta hamalau golera ere eraman zuen Füchse-k, baina Bidasoak hori murrizten ere jakin zuen. Artalekun zeuden 1.786 zaleek babesa eskaini zioten etxeko taldeari eta, horren laguntzaz, partiduaren 60 minutuak bukatuta, zortzi goleko aldea zegoen markagailuan behin-betiko, 32-40koa.

Atzoko jardunaldiaren nota azpimarragarria Xabier Barretok Europako Txapelketan egindako debuta izan zen. Bi gol sartu zituen jokalari gazteak eta zaleek ere bere lana goraipatu zuten harmailetatik.

Bidasoak, porrot honen ostean, datorren ortziralean (otsailak 17) du begirada jarrita. Izan ere, Plenitude ASOBAL Ligari jarraipena emanen diote Artalekun, eta bertan garaipena beharrezkoa du talde irundarrak. Oraingo honetan, Bathco Torrrelavega jaso beharko dute Jacobo Cuetararen mutilek, 21:30ean.

(Argazkia: Edu Agreda)