Federazio Kopatik kanpo gelditu da 2015eko txapelduna

Kanporaketa bakarra jokatu du aurten Real Unionek Federazio Kopan. Final hamaseirenetan hasi da lehiatzen, baina ezin izan du aurrera egin. Rayo Majadahondak utzi du kanpoan. Joaneko partida hutsean amaitu zen, Stadium Galen. Itzulikoan, talde madrildarrak mendean hartu du Union, El Cerro del Espinon. Aldeko norabidea hartu du neurketak, Aritz Mujikak aurretik jarri baitu talde irundarra, 17.minutuan. Baloiaren jabetzan nagusi izan dira txuribeltzak hurrengo minutuetan, baina lehen zatiaren azken txanpan, kolpe latza eman die Rayok. Bost minutuko tartean bi gol sartu ditu etxeko taldeak, eta abantailarekin hartu du aldagelarako bidea. Bigarren zatian saiatu baldin bada ere, Real Union ez da gai izan kanporaketa bere alde erabakiko zukeen gola sartzeko. Beraz, Federazio Kopatik kanpo gelditu da.