EUSKARAREN ERABILERA SUSTATZEKO LEHEN FUTBOL TXAPELKETA

Bilboko Hamabi Futbol Klubak antolatuta, “Euskara Jaldi Hadi Plazara” futbol txapelketaren I. edizioa ospatuko da larunbatean Lezaman

Larunbat honetan, ekainak 11, Hamabi Futbol Klubak antolatutako “Euskara Jalgi Hada Plazara” futbol txapelketa ospatuko da lehen aldiz. Lezaman, Athletic-en instalakuntzetan, egingo da eta ekimen berri honen helburua euskararen erabilera sustatzea izango da. Bertan, Bilboko Hamabi FK-arekin batera, Tuterako Union Tutera, Ortzaizeko Arranoak eta Aretxabaletako UDA taldeak egongo dira.

“Futbolean ere euskaraz joka daitekeela” erakutsi nahi dute “Euskara Jalgi Hadi” Txapelketako I. edizioan parte hartuko duten futbol klubek. Horretarako, “Euskal Herriko txoko desberdinetako” lau klub elkartuko dira larunbat honetan Lezaman, kirolean ere euskararen erabilera aldarrikatzeko eta, bidenabar, “talde gehiago batu daitezen bere eguneroko jarduera euskaraz egitera”, Hamabi Futbol Klubak plazaratu duen komunikatuan argitu duen moduan.

Hamabi FK, Union Tutera, Arranoak eta UDA kluben arteko futbol txapelketa izango da eguneko ekitaldirik garrantzitsuena, baina horretaz gain, sari bat ere banatuko zaio euskara gehien erabiltzen duen taldeari, eta bertsolariak ere arituko dira jaia girotzen. Gainera, neurketa guztiak epaile euskaldunek gidatuko dituztela jakinarazi dute antolatzaileek.

Goizeko 11:00etan hasiko da mugimendua Lezamako Kirol Intalazioetan, bertan taldeei egingo zaien harrerarekin. 11:25etan bertsolariek beraien bertsoak eskainiko dituzte. 11:30ean aldiz, txapelketari hasiera emango zaio, Hamabi FK eta Union Tutera eta Aretxabaleta KE eta Arranoak FC taldeen arteko partiduekin. 12:15ean, Arranoak FC Hamabi FK-ren aurka arituko da eta Aretxabaleta KE Union Tuteraren kontra. Azkenik, 13:00etan, Hamabi FK eta Aretxabaleta KE eta Union Tutera eta Arranoak FC ariko dira elkarren aurka. Jardunaldia borobiltzeko, 14:00etan, luntxa eskainiko zaie partehartzaile guztiei.