Euskal Ligako Bigarren Fasea jokatuko du kadete mailako BM Bidasoa Irun taldeak

BM Bidasoa Irun kadete mailako emakumeek Euskal Ligako Bigarren Fasea jokatuko dute asteburu honetan, denboraldiko igoera promozioetako bat izanen dena. Ermuan jokatuko da lehiaketa eta Errotabarri, Basauri eta Muskiz izanen dira talde irundarraren aurkariak. 

Eñaut Uruñuelak gidatzen duen taldea, Gipuzkoako Kadeteen Ligan denboraldi erregularra egin ondotik, bigarren postuan sailkatu da, Saieko Olatzekin berdinduta, baina golaverage okerragoarekin. Honekin guztiarekin, Bidasoak igoera promozioa jokatuko du asteburu honetan, Ermuako Miguel Angel Blanco kiroldegian. 

Gaur jokatuko du taldeak lehen partidua, urtarrilaren 24an. Errotabarri izanen da lehen aurkaria. Bihar berriz, urtarrilaren 25ean, 15:00etan Basauriren kontra ariko da talde irundarra eta azkenik, igandean (urtarrilaren 26an), Muskizen kontra ariko dira, 16:30ean. 

Jubenil mailako emakumeak ere Euskal Ligara igotzen saiatuko dira

Bidasoako jubenil mailako ID Trans Bidasoa Irun taldeak ere Euskal Ligara igotzeko partidua jokatuko du etxean, Artalekun. Goizper Bergara izanen du aurrez aurre bihar, urtarrilaren 25ean, 16:00etan. Gipuzkoako txapelduna izateko aukera eta Euskal Ligara igotzekoa izanen du biharko partidua irabaziz gero. Hori lortuta, urtarrilaren 31ko asteburuan jokatuko dute promozioa. 

Honez gain, jubenil eta kadete mailako taldeek lortutako emaitzei esker, Bidasoak, klub gisan, Euskal Ligara igotzeko fasean parte hartuko du heldu den maiatzean, 2025/26 denboraldirako plaza eskuratzeko helburuarekin.