Euskal Kopa altxatu du Bidasoak
ZARAUTZ: Ander Atorrasagasti (3), Aitor Atorrasagasti (1), Amilibia (1), Garate (1), Torriko (3), Agirregomezkorta, De Carlos, Etxaniz (2), Olaizola (2), Beristain, Iztueta, Iraeta (5), Ondarra (2), Hidalgo.
BIDASOA: Dejanovic, Cavero (2), Vazquez (1), Martinez (2), Crowley (1), Beltza, Portero (2, Villar (5), Zubiria, Bezbradica (2), Mouriño, Davidovic (3), Azkue (7).
Gaur egun, EAEko eskubaloian nagusi dela erakutsi du Bidasoa-Irunek, Euskal Kopa irabazita, bigarren aldiz segidan. Zarautz menderatu du igande eguerdian Orioko Karela kiroldegian jokatutako finalean. Ligak izan duen eten luzeak ondorioak izan ditu, taldeek ez baitute mailarik onena eman. Bi taldeetan falta ziren jokalarien hutsuneek ere eragina izan dute, neurri batean. Lehen zatian, Bidasoa ez da Zarautz baino gehiago izan. Bolada onak izan ditu, eta abantaila politak hartu ditu. 17.minutuan, esaterako, hutsartea eskatu behar izan du Aitor Urbitarte Zarautz taldeko entrenatzaileak, 4-8 galtzen ari baitziren txuribeltzak. Erantzuna eman dute segidan, eta 8-8koa jarri dute bi minutu eta erdiko epean. Intentsitateari jarraipena eman ezean, larri ibiliko zirela gogorarazi diete horrela zarauztarrek irundarrei. 10-12ko emaitza irudikatu du markagailuak atsedenaldian.
Bigarren zatiaren hasieran, norgehiagokari emozioa eman dio Zarautzek, 14-15era gerturatu baita, 40.minutua bete baino lehen. Hortik aurrera, ordea, hobera egin du Bidasoak. Finala irabazteko lan egin behar zutela konturatu dira horiak, eta eman duten urratsa nahikoa izan da Zarautz mendean hartzeko. 50.minutuan 16-22 irabazten ari zen Bidasoa. Baina Caverok bi minutuko zigorra jaso du, eta Zarautzek lehiari eusteko azken aukera izan du. Irundarrek, hala ere, sendo eutsi diote arerioaren bultzadari, jokalari bat gutxiagorekin ere. Finalaren amaiera erosoa izan da Bidasoarentzat. Eguneko helburua bete du, Euskal Kopa eskuratu baitu. Ligako lehia estuari begira, dezente hobetu beharko du.
