EUSKAL DERBIA JOKATUKO DA BIHAR ARTALEKUN

Bidasoak Anaitasuna jasoko du etxean bihar, arratsaldeko 19:00etan

Astearteko garaipenaren ondotik, Bidasoak euskal derbiari aurre egin beharko dio asteburu honetan. ASOBAL Ligari segida emateko, talde irundarrak Anaitasuna jasoko du Artalekun. Bi talde hauen arteko derbia beti da berezia bi aldeko zaleentzat eta beraz, giro horrekin Bidasoa iruindarrei aurre egiten saiatuko da. Partidua bihar (urriak 29) jokatuko da, arratsaldeko 19:00etatik aitzinera.

Jacobo Cuetarak aipatu duenez, Anaitasuna “talde ona da. Derbi hau beti izaten da oso parekatua. Aurten gugandik puntu bakarrera dago eta neurketa oso parekatuak jokatu ditu orain arte. Gainera, azken urteetan sailkapenean goiko postuetan dauden taldeen kontra hobeki aritzen da eta oso arriskutsua izan daiteke”.

Biharko neurketan garaipena eskuratzeko gakoa, “partzialetan” dagoela azpimarratu du Cuetarak: “Partzial desberdin asko izaten ahal dituen partidua izan daiteke, urduritasun handiarekin. Horregatik, errenta zabalak eskuratu beharko ditugu eta horiek, egon daitezkeen egoera zailetan, mantendu”. Horrez gain, Artalekuren babesa ere garrantzizkoa izan daitekeela onartu du prestatzaileak: “Etxean oso lehiakorrak izaten ari gara eta horrela jarraitu behar dugu. Artaleku oso garrantzitsua izaten ari da, asko laguntzen ari gaitu eta horrelako neurketa parekatu batean ere gakoa izan daiteke”.

Logroñoren aurkako porrotaren ostean, Bidasoa atsekabetuta geratu bazen ere, horri buelta emateko gaitasuna erakutsi zuen pasa den asteartean. “Porrot baten ondotik, erantzuna dator eta horrela izan da. Oso garrantzitsua da hori egiten jakitea, talde handiek egiten baitute hori”, adierazi du Cuetarak.

Hala ere, astearteko esfortzua oraindu dute jokalariek eta bihar zein kantxaratuko diren oraindik zalantzan dago. Izan ere, zenbait jokalari minez ernatu ziren hurrengo egunean. Horietako bat Tao Gey-Emparan da, Salinasen bajari gehituko zaiona. Bertzeak, Ugarte eta Rodriguez barne, gaurko entrenamenduaren zain egongo dira deialdian sartuko diren edo ez ziurtatzeko.