Etxetik kanpoko bolada txarra hautsi du Real Unionek

GETAFE B: Gil, M. ángel, Villalón, Carbonell, Saura, Wanderson, Juan Hernández (Ian, 58'), Barahona, Emi Buendía (Del Pozo, 72'), Borja Galán, Arcas.

REAL UNION: Txusta, Azkoiti, Aimar, Esnaola, Morcillo, Rodellar, Urkizu (Galán, 77'), Martins (Iriondo, 80'), Eizmendi, Ozkoidi (Alonso, 73'), Alain Barrón.

GOLAK: 0-1: Eizmendi (17'). 0-2: Azkoiti (50'). 0-3: Eizmendi (93').

Garaipen sendagarria eskuratu du igande eguerdian Real Unionek. Getafen irabazi du, etxetik kanpoko aurrekari txarrak alde batera utzita. Nagusi izan dira txuribeltzak, eta garaipen argia lortu dute. Getafek izan du lehen aukera, Wandersonen jaurtiketarekin. Segidan, Unionek abantaila hartu du markagailuan. Eneko Eizmendik sartu du gola, 17.minutuan, Barrónen erdiratzea baliatuta. Taldearen hobekuntza orokorra eragin du golak. Konfiantza eman die jokalari txuribeltzei. Bigarren gola sartzeko abaguneak izan dituzte Azkoitik eta Ozkoidik. Dena den, Getafek ere hurbil izan du berdinketa. Borja Galánek eta Arcasek izan dituzte aukera onenak.

Bigarren zatia hasi bezain pronto, gol lasaigarria sartu du Mikel Azkoitik, 50.minutuan. Martinsek ateratako korner batean izan da. Abantailarekin eroso, Getafe baino gehiago izan da Union bigarren zati osoan zehar. Hala ere, lehiara bueltatzeko aukera izan du etxeko taldeak, zutoinera bidali baitu baloia Ianek, 70.ean. Unionek ere behin baino gehiagotan izan du hurbil gola. Urkizuk eta Jorge Galánek eskura izan dute hirugarrena, baina azkenean Eneko Eizmendik egin du, luzapenean. Hogei puntu ditu jada Real Unionek, eta sailkapeneko bosgarren tokian dago orain. Puntu bakar bat gehiago du Amorebieta laugarren sailkatuak.