Etxekoek irabazi dute Stadium Galeko derbia
REAL UNION: Txusta, Azkoiti, Aimar, Esnaola, Urkizu, Martins (Iriondo, 27'), Romo, Ozkoidi (Ribera, 86'), Mujika, Galán (Barrón, 82'), Eizmendi.
REAL SOCIEDAD B: Bardaji, Odriozola, Rodrigues, Ugarte, Babic, Zubeldia, Muguruza (Merquelanz, 77'), Guridi, Bautista (Jauregi, 89'), Capilla, Sangalli.
GOLAK: 1-0: Ozkoidi (48'). 2-0: Galán (50'). 2-1: Bautista (66'). 3-1: Eizmendi (76').
EPAILEA: Díez Cano. Txartel horiak: Esnaola, Urkizu, Ozkoidi (Real Union); Ugarte, Guridi (Real Sociedad B).
Gipuzkoarren arteko derbia jokatu dute Real Unionek eta Real Sociedad Bk ligako 25.jardunaldian. Hiru puntuak Stadium Galen gelditu dira, irundarren eraginkortasunari esker. Lehen ordu laurdenean Galanek izan ditu gol aukerarik onenak. Atezainaren aurkako buruz-burukoan huts egin du lehenengo, eta Eizmendik egoera ederrean utzitako baloia kanpora bidali du ondoren. Gainerakoan, ordea, txuribeltzak ez dira fin ibili. Behin eta berriro lapurtu du baloia Sansek, eta arriskua sortu du Txustaren atearen inguruan. 25.minutuan, Mikel Martinsek zelaia utzi du, min hartuta. Iriondok ordezkatu behar izan du, nahikoa berotu gabe. Lesioak are gehiago ahuldu du Union, eta itxura txarra hartu du norgehiagokak. 30.minutuan, gola sartu du filial txuri-urdinak korner batean, baina faltagatik baliorik gabe utzi du epaileak.
Aldaketa handia behar zuen Real Unionek, eta aldagelatik irten bezain pronto iritsi da. 1-0ekoa sartu du Ozkoidik, boleaz, jokaldi ederra borobilduta. Eneko Romok egin du azken pasea. Bi minutu beranduago, abantaila handitu du Galanek, buruz, Urkizuk ezkerrez egindako erdiratzea baliatuta. Konfiantza berreskuratuta, hobeto aritu dira txuribeltzak hurrengo minutuetan. Esnaolak beste abagune on bat eduki du korner batean, baina Bardajik urrundu du burukada. Txustak beste hainbeste egin du gero beste atean, Guridiren gola ekiditeko. Lehen abisua izan da, eta gehiago ere eman ditu Sansek golaren aurretik. Azkenean, 71.minutuan murriztu du Bautistak markagailuko aldea, kontraerasoa buruz borobilduta. Etxekoak urduritu ditu golak, eta ez dira eroso ibili hurrengo minutuetan. Hala ere, filialari gehiegi hazteko aukera eman gabe, hirugarren gola sartu du Eneko Eizmendik, 77.ean, boleaz baita ere. Erabakigarria izan da 3-1ekoa. Aurrerantzean, Sansek ez du Real Union gehiegi estutu.
