ERREGE KOPAKO AZKEN FASEAN IZANGO DA BIDASOA

Atzoko partida 27-26ko markagailuarekin amaitu ondoren, Bidasoak azken faserako pasea irabazi zuen 

Atzo arratsaldean jokatu zen, Benidormen, Bidasoa eta Benidorm taldeen arteko Errege Kopako hirugarren kanporaketako itzulerako neurketa. Bidasoa zazpi goleko abantailarekin kantxaratu zen Palau l´Illan eta, nahiz eta ez zuen partida irabazi, Antequeran azken fasean egoteko aukera eskuratu zuen.

Bidasoa eta Benidormen aurkako atzoko norgehiagoka oso berdinduta egon zen eta hori markagailuan islatu zen. Lehenengo zatitik bi taldeak hartu-emanean ibili ziren eta 30. minutuz, alderik zabalena bi golekoa izan zen. Bidasoa hiru aldiz egon zen aurretik, defentsan eta atean egin zuen lanai esker. Hala ere, atsedenaldira Benidorm puntu bat gehiagorekin iritsi zen, 13-12koarekin.

Bigarren zatia hasi eta segidan, berdinketa lortu zuten irundarrek (14-14, 35. minutuan). Nahiz eta indarrez hasi azkeneko 30 minutu hauek, Bidasoak ez zuen lortu markagailua iraultzea eta Benidorm, berriz ere, aurretik jarri zen puntu bateko aldearekin. Etxeko taldeak horrela mantendu zuen markagailua partidaren 50. minutura arte. Orduan, Xoan Ledok atetik atera baloia jaurti eta sarera sartzea lortu zuen, 21-22koa eskuratuz. Dena dela, Benidormek bere indarra erakusten jarraitu zuen, eta berriz ere aurrea hartu zion neurketari amaierara arte. Horrela, atzoko jardunaldia 27-26koarekin gelditu zen etxeko taldearen alde.

Nahiz eta partida ez irabazi, Bidasoak bere helburua eskuratu zuen atzo. Izan ere, joaneko neurketan Artalekun lortutako abantaila baliatuz, Errege Kopako azken faserako txartela irabazi zuten irundarrek. Jacobo Cuetara oso pozik azaldu zen lortutakoarekin: “Kanporaketa hau gainditzea lortu dugu, modu oso fidagarrian. Oso zaila zen neurketa, aurkari gogorra egokitu baitzitzaigun. Oso pozik egoteko modukoa da. Gure denboraldiko helburuetako bat lortu dugu eta Antequerako azken fasean izango gara”. Bidasoa, azken urteotan, Asobal Kopako eta Errege Kopako final askotan egon da eta horri garrantzia eman behar zaiola ere gaineratu zuen entrenatzaileak: “Finaletan egoteko zailtasunari bere garrantzia eman behar zaio. Errege Kopako azken fasean sartu gara eta Asobal Kopako finalean sartzea garatzen zaigu. Ohikoak bihurtu gara momentu handi hauetan eta hau baloratu behar dugu”.

Jon Azkue jokalariak ere aipatu zuen moduan, “Artalekuk pisu handia du horrelako kanporaketetan eta han lortu genuen emaitza ontzat eman genuen”. Irunera garaipena eskuratu ezinik, baina taldearen helburua beteta bueltatuko direla ere azpimarratu zuen: “Pena horrekin goaz, garaipena lortu ez izanarena, baina oso kontziente ginen gaur lortu beharrekoa Antequerako azken fase horretan egotea zela eta helburua beteta goaz”.

Bidasoak hurrengo jardunaldia larunbatean izango du. Orain honetan, Asobal Ligako beste neurketa bat izango da, Frigorificos Morrazo taldearen aurka. Artalekun arituko dira, eguerdiko 12etan. 

(Argazkia: Edwin van t´Hek)