Donostiarra A, Arraun Lagunak eta Badok 12 ontziak Hondarribiako XXV. Jeitsieran irabazle

Hondarribiko hondartzan jokatu zen Hondarribiko XXV. Jaitsiera, pasa den martxoaren 15ean, larunbat arratsaldean. Arraun egiteko baldintzak ez ziren onenak, haize bolada indartsuak izan zituzten, eta itzulerako luzean ipar mendebaletik zetozen alboko olatuek ohikoa baino lan gehiago egitera behartu zituen arraunlariak, baita patroiak ere. Estropada jokatu artean behintzat ateri mantendu zen zerua eta horrek kai-muturra kolore askotariko zaletuek betetzea ahalbidetu zuen. Hotza nagusi izan zen arren, arraunlariak animatzeko prest bertaratu ziren.

Beteranoen artean Badok 13 A ontziak irabazi zuen lehia, kronoa 14:38,91an geldituta. Fortunak eta Zumaia Ak osatu zuten podiuma.

Emakumeen artean, berriz, garaipena Arraun Lagunak ontzi donostiarrarentzat izan zen. 15:00,18ko denborarekin bandera astintzea lortu zuten. Hurbil izan zituzten tolosarrak, soilik 89 zentesimetara. Hirugarren Orio izan zen, irabazleek baino 13,18 segundo gehiago behar izan zituen. Etxekoei dagokienez, berdeek estropada bikaina egin zuten eta bostgarren postuan sailkatu ziren, laugarrenetik 53 zentesimentara (15:18,70).

Gizonezko seniorretan Donostiarra Ak irabazi zuen jardunaldia, 20:35,81eko denborarekin. Bigarren izan zen Ondarroa (20:41,15), eta hirugarren Getaria (20:45,22). Etxekoek emakumeen bostgarren postua errepikatu zuten, garailetik 20,33 segundora (20:49,17). B ontzia aldiz, 14. helmugaratu zen, kronoa 21,40,58ean geldituta.

Hurrengo hitzordua hilaren 30ean izanen da, igandea, Sanpedrotarrak elkarteak antolatuta. Aurredenboraldiko azken traineru jaitsiera izango da.