Bidasoak denboraldiko lehen garaipena eskuratu du

Bidasoa Irunek denboraldiko lehen garaipena eskuratu zuen pasa den larunbatean Artalekun, Bada Huescari 35-30eko markagailuarekin irabazita. Villa de Arandarekin berdindu eta Barçaren kontra galdu ondotik, talde horiak 3 puntu batu ditu Plenitude ASOBAL Ligako sailkapen orokorrean. 

Etxeko taldea izan zen markagailuan aitzina hartzen lehendabizikoa. Partidua hasi eta hamargarren minutuan, 7-6ko emaitza lortu zuen talde irundarrak, Frank Cordiesek lehen zortzi minutuetan sartutako bortz golak iraulita. Horren ondotik, 4-0eko partzialarekin, tarte erosoa ireki zuen Alex Mozasen taldeak eta atsedenaldira, 19-14ko emaitzarekin joan ziren. 

Aldageletatik pasatu ondoren, dinamika berarekin kantxaratu zen Bidasoa, eta bortz goleko errenta hori mantendu zuten bukaera bitarte. Azkenean, 35-30eko markagailuarekin irabazi zuten, denboraldiko lehen garaipena eskuratuz eta, lehen aldiz, bi puntuak osorik bereganatuz. 

Heldu den larunbatean, urriaren 5ean, talde irundarra berriz ere Artalekun izanen da Cuencaren kontra (17:00etan).