Biok Txingudiri azken minutuetan ihes egin zion garaipenak

Txingudi Rugby Klubeko Biok Txingudik 17-22 galdu zuen asteburuan, Plaiaundin, Durango taldearen kontra. Azken minutura arte borrokatu zuen etxeko taldeak garaipena lortzeagatik, baina puntuak eskuratzeko azken saiakera zapuztu zuen aurkariak. Porrotarekin, baina bonus puntu bat lortuta bukatu zuten mugakoek jardunaldia.

Lehen minututik gogor zelairatu zen Biok Txingudi, nagusitasuna edukitzeko eta baloia azkar mugitzeko helburuarekin, Durangoren hiru laurdenen jokoa ahalik eta gehien murrizteko asmoz. Planteamendu honek segidan eman zituen bere fruituak eta laugarren minutuan, Lea Etxebarrietak 5-0ekoa ezarri zuen markagailuan. Hala ere, Durangok segidan erantzun zuen eta kontraerasora atera ziren entseguaren ondotik eta zazpi minutu beranduago, berdinketa ailegatu zen hiru laurdenen jokaldi batekin (5-5). Hurrengo minutuetan, bi taldeek emaitza euren alde jartzeko ahaleginetan segitu zuten, baina ez zuten lortu eta beraz, 5-5eko berdinketarekin joan ziren atsedenaldira. 

Bigarren zatian, Durango erritmo gehiagorekin zelairatu zen eta mugakoen arean sartu ziren segidan. Etxekoek defentsa sendo bat erakutsi zuten, nahiz eta bisitariek zigor kolpe baten ondotik, harresian zuloa aurkitu, eta bost puntu gehiago lortu zituzten (5-10). Biok Txingudik erasora jo zuen ondorengo jokaldietan eta saiakera batzuen ondotik, melé baten irteeran, Uxune Alkortak entsegua egin eta Alba Saizek eraldaketa lortu zuen, 12-10ekoa ezarriz eta markagailuan aitzina hartuz. Indarberrituta, hurrengo jokaldietan ere durangarren entsegu-eremura ailegatu ziren mugakoak, baina aurkariak baloia lapurtu eta kontraeraso azkar batean, zazpi puntu gehiago batu zituzten berriz ere emaitza euren alde jartzeko (12-17). Hau guti balitz, bi minutu beranduago, baloia bigarrenez lapurtu eta hiru-laurdenek egindako kontraeraso batekin entsegu eraman zuten baloia 12-22koa ipintzeko. 

Biok Txingudik ez zuen amore eman eta erasoa jo zuen hamar puntuko aldea murrizteko helburu garbiarekin. Lanak fruituak eman zituen berriz ere eta Paola Vegak egindako bertze entsegu batekin, durangarrek irekitako hutsunea murriztu zuten etxekoek (17-22). Azken aukera bat ere eduki zuten mugakoek emaitza berdintzeko bederen, azken baloia ere eurena izan zelako. Hala ere, jokaldi honetan ere, Durangok baloia lapurtu eta denbora gehiagorik gabe gelditu ziren bi taldeko jokalariak, 17-22ko behin-betiko emaitza lortuta. 

Txingudikoek galdu bazuten ere, bonus puntu bat eskuratu zuten larunbatean Plaiaundin, zazpi puntu baino gutiagotik galdu zuelako. Sailkapeneko laugarren postuan dago kokaturik taldea, hamabost punturekin guztira. Denboraldiko azken neurketa gelditzen zaie soilik jokatzeko, Iruñean La Unica taldearen kontra. Hemendik bi asteburutara ospatuko da partidua. 

14 urtez azpikoek finala hurbil dute

14 urtez azpiko Txingudi/Orereta/Baztan taldeak Gipuzkoako Ligako finalerdiak jokatu zituen Hernani/Atletico San Sebastiaren kontra Plaiaundin. Hasieratik kontrolpean eduki zuten neurketa etxekoek eta talde bisitariak ez zuen aukerarik izan puntuak eskuratzeko. Baloia azkar mugitu zuten mugakoek, metroak irabaziz eta entseguak lortuz. Bukaeran, aurkaria gai izan zen aldea murrizteko, baina saiakera ez zen nahikoa izan 35 puntuko hutsunea deuseztatzeko. 

Itzulerako partidua beraz, erosotasunez jokatzeko aukera izanen dute mugakoek. Hala ere, gogor aritu beharko dira, Hernani/Atletico talde indartsua baita eta gogor aritu da denboraldi honetan. Azarotik zeraman taldeak galdu gabe eta Plaiaundin izandako porrot honi buelta eman nahiko diote Landaren, heldu den asteburuan.