Biok Txingudik Ligako bigarren faseko azken aurreko neurketa jokatuko du Plaiaundin

Txingudi Rugby Klubeko Biok Txingudik Durango Ermarmotor jasoko du larunbat honetan, martxoaren 29an, Plaiaundin (16:00). Ligako bigarren faseko azken aurreko jardunaldia izanen da eta garrantzitsua, mugakoek aukera aprobetxatu nahi duelako sailkapeneko hirugarren postua lortzeko. Momentu honetan, bidasotarrak laugarrenak dira eta durangarrak hirugarrenak. Beraz, aurkari zuzenak diren bi taldeen arteko lehia izanen da ikusgai Plaiaundin. 

Biok Txingudik erronka garrantzitsua izanen du larunbat honetan etxean. Durango jasoko dute mugakoek, bere aurkari zuzena den taldea. Ligako bigarren fasea bukatzeko, bi neurketa falta dira eta horietan sailkapeneko hirugarren postua eskuratzeko aukera du Asier Gonzalez, Alejandro Lasa eta Patxi Artolaren taldeak. Durangok 20 puntu ditu, Biok Txingudik baina sei gehiago eta beraz, mugakoek garaipena eskuratu beharko dute bai partidu honetan, baita hurrengoan ere, matematikoki hirugarren postura igotzeko. Horrez gain, durangarrek porrot egin beharko dute partidu hauetan ere. Erronak zaila bada ere, mugakoak prest dira ahalik eta maila hoberena erakusteko eta garaipena eskuratzeko. 

14 urtez azpiko taldea Gipuzkoako Ligako finalerdietan

14 urtez azpiko Txingudi/Orereta/Baztanek Gipuzkoako Ligako finalerdia jokatuko du Plaiaundin ere, larunbatean 10:30ean. Hernani/Atletico izanen du aitzinean eta mugako taldeak txapelketa irabazteko borrokan segituko du, azken aldian bezala. Finalerdiak bi itzuli izanen ditu. Lehena Plaiaundin izanen da larunbat honetan eta bigarrena, heldu den asteburuan kanpoan. 

Errugbi Olinpiaden hirugarren edizioa

Larunbat honetan ere, Plaiaundin, eskualdeko ikastetxeen errugbi topaketa ospatuko du Txingudi Rugby Klubak. Errugbi Olinpiadak izenpean antolatu dute hirugarren aldiz topaketa hau eta 14 urtez azpiko taldearen partiduaren ondotik izanen da. Xabi Sanchez klubeko koordinatzailearen hitzetan, “ikasturtean zehar bisitatzen ditugun ikastetxeak elkarren artean partidak jokatzeko antolatzen dugu topaketa hau. Honela, Plaiaundi ezagutzeaz gain, errugbiaren beste elementuak erakusteko aukera eman digu ekitaldi honek”. Kirol Aukera eta Pasquier Recondo enpresek laguntza berezia emango diote klubari ekitaldi honetarako.

Aste Santuan errugbi eskaintza

Ekitaldi hauez gain, Txingudi Rugby Klubak oroitarazi du Aste Santuan ludoteka zerbitzua eskainiko duela. Apirilaren 22tik 25era izanen da, 9:00etatik 13:00era. Bitarte horretan, ekintza ezberdinak egiteko aukera izanen da Plaiaundiko zelaian. Izen ematea dagoeneko irekia dago eta klubak ere helbide elektroniko bat eta telefono zenbaki bat jarri ditu eskuragarri informazioa gehiago nahi dutenentzatko: info@txingudirugbyclub.eus edo 688 74 53 62.